Ёсат хуват нёхамтыта масӆ, ӆыӆ сув катта. Хор: Гаврил Климов

<div class="content-lead">Приуральской район Охсар похална мет сара нёхамтыты энамты нэңху ол, ӆув нэмаӆ Гаврил Климов. Там ванан Гаврил Валерьевич Ивановской область Гаврилов посад васна мет хув дистанция нёхамтыта яңхас, щит 109 километра.</div><p>Щи ультрамарафон нэмаӆ «Русская тропа, ӆув «РТ100 «Лютая» дистанция пирыяс, щит сат молтас километра орат па йиңкат хуват.</p><p>Щи хуват хув ёс нёхамты ораңна Гаврил эӆты масас 13 час 10 минут па 4 секунда, щи арат мур нэңху кутна ӆув холмет таха вус. Щи томпына ӆув ван дистанция нёхамтыяс, холам километра, щита ӆув киметты этас.</p><p>«Тамащ хув дистанция нёхамты ораңна, ялан ма сэңк такан ӆэщатысам. Ма тренерам Денис Власенко, ӆув пиӆэӆна кевна яңхсаман, щита ӆув манэм онтасӆы хоты щимащ ёсат хуват нёхамтыта масӆ, ӆыӆ сув катта. Ӆэвасы нэңху тамащ хув таха ант ӆэщатыман манта ант веритӆаӆӆы», — Гаврил Климов лавас.</p><p>Туняӆ ищи щи арат нёхамтыман ӆув щи дистанция 14 час 28 минут па 17 секунд аратна мантсаӆӆы.</p><p>Вера Лонгортова хансам потар</p>

Мет сара нёхамтыты энамты нэңху

Там программа 2004-мет таӆ эӆты рупитты питас. Хор: ЯНАО губернатор пресс-служба

<div class="content-lead">Ямал па Югра муван уӆты хоятат пенсияя мантэӆан, хошам муват пеӆа уӆты касаӆӆат. Шеңк хува ант мантыйн, Тюмень вошан па ванан уӆты куртатан уӆты рахаӆ. Щи кеша «Сотрудничество» программа ӆэщатман уӆ.</div><p>Там программа 2004-мет таӆ эӆты рупитты питас. Там пуш хус таӆа йис, хоты хуӆам регион яха пиӆтащман рупитӆат. Щи пора эӆты ӆапат щёрас хоттэӆ хоят хошам муват пеӆа касаӆсат. Тюмень вошан Ямальской-1 па Ямальской-2 микрорайонңан ӆэщатсайңан, яӆап хольмаң пеӆа няӆ хот омасса. Ӆапкайт, щутщаты, ёнтты па касты харат ванан уӆӆат, ашкуӆайт па ай няврэмат шавиты хотат пуншсайт.</p><p>Пиращ хоятат, Овс муван маты пенсия охаӆ па тыӆащ сохаптаты хот охаӆ нётман тайӆа. Рупитты ёх леккар хотата яңхты верытӆат. Энамты няврэмат щутщаӆат. «Сотрудничество» хуват округ хоятӆув щита уӆты санаторияята яммаӆтыты яңхӆат.</p><p>Тюмень вошан хот шитты ураңан ин ант мосаӆ хот верат туты департамента манты, Госуслуги па МФЦ хуват нэпекат маты рахаӆ. Щиеӆ пеӆа уӆты манты еӆпийн, мосаӆ Овс муван иса уӆты па ветхощъяң таӆ тата рупитты.</p><p>«Сотрудничество» программа ӆыпи рупатайӆ щиты верман уӆ, нётапса мосты порайн, хоӆта мосаӆ, щиеӆ пеӆа кератты ат рахас. Хуӆам регионан уӆты хоятат, уӆапсаеӆ яма па кенашак верты ураңан там программа ӆэщатман уӆ», — Тюменской область куща ху Александр Моор ястас.</p><p>Зоя куртямова ханшам потар</p>

Хоят уӆапса кен верты программа

Ӆорвош район веӆпасӆаты нэпек ӆэщатты хотан хоят тэӆые ус. Хор: amic.ru

<div class="content-lead">Округеван, унт ӆор тыӆащ ӆапатхощъяңмет хатӆ эӆты унтан уӆты тохӆаң войт веӆпасӆаты пора пуншса. Хольмаң пеӆа ветмет хатӆ эӆты йиңкан мартатӆыты па нюраман уӆты васэт ищи веӆты рахты питас.</div><p>Хащам ӆапатан Ӆорвош район веӆпасӆаты нэпек ӆэщатты хотан хоят тэӆые ус. «Шоши мув хоятӆув ӆэваса пошкан пиӆан унта ант яңхӆат. Нэпекӆаӆ иса ӆэщатман тайӆаӆӆаӆ. Уӆтыйн, васы веӆпасӆаты порайн кат щёрас пеӆа хуӆамсот нэпек ханшӆтаӆув. Тампуш йи хоята яң ӆунт па ветъяң васы веӆты рахаӆ. Вет лук, яң кутар, хольмаң кущты вой, хутъяң няхты вой лицензия нэпекан ханшты эсаӆӆа», — Мужи вошан вой веӆпасӆаты нэпек ӆэщатты хотан куща ху Сергей Алексеевич Молчанов ястас.</p><p>Хой веӆщи веӆпасӆаты нэпек ӆэщатаӆ па хойтат ёшан тайм нэпекӆаӆ нох вусайт, 2025-мет таӆан, щёхар тыӆащ оӆаңмет хатӆ эӆты экзамен маты мосты питаӆ. Экзамен матыйн уйтты: хоты пошкан тайман номсаңа уӆты, унтан шушиӆыман ант ушты, веӆам вой пиӆан муй верты.</p><p>Зоя Куртямова ханшам потар</p>

Веӆпасӆаты пора пуншса

Тата верам ропатайт хоща Овс мув ӆыӆ сув щатӆ. Хор: Сергей Зубков

<div class="content-lead">Тампус Гран-при майӆапсы Владимир Похилюк Магадан эваӆт ясна пайтас, ӆув «Прощание славянки» лов эваӆт эвтас, Ямал мув тус ясаң нэңхэт па призёра этсат.</div><p>Лов эваӆт верты ропатайт хоща алаң таха Кирилл Никифоров Ноябрьск вас эваӆт вус, холметты па Нина Каргачева Толька эваӆт этас. Мет ямас па, лов эваӆт эватӆаңан Дмитрий Скворцов Пулңават эваӆт, ӆув кимет таха вус па Алексей Зайкин Новый Уренгой эваӆт — холмет таха.</p><p>«Манэмна сэңк ям Ямал мувна ёхатмем. Там касты хар самамна сэңк ванна хайс. Тата верам ропатайт хоща Овс мув ӆыӆ сув щатӆ, касаң мастер тата сэңк вуӆ ёр тайӆ, ӆув ропатайӆаӆ пеӆа вантман мохты ныӆа хой-хой мала верас», — жюри хоща олам Хао Шоумин лавас.</p><p>Лов эваӆт эватты «Душа Севера» нэмпи касты харна нох питам тус ясаң нэңхэт ох майӆапсына масайт, щит 100, 90 па 80 щёрас соӆкува, Гран-при па катсат щёрас.</p><p>Вера Лонгортова хансам потар</p>

Тус ёсаң нэңхет касапса етсас

Pulse.Mail

Яндекс.Дзен

Google.News

Яндекс.Новости

Мэӊ ёхӆув нух питсэт куӆ каверта ёх кутэн. Хор: Галина Кечимова

<div class="content-lead">Тэм ванэн округевэн ӆэтут емэӊ хатӆәт вӓри. Чи емэӊ хатӆәт «Нянь-фест» нэм тойсэт. Мэӊ вочев эвэӆт мансэт Наталья Мултанова, Елена Каткилева, Кристина па Константин Юровы.</div><p>Касты хара чи ёх администрация вочев нётэс манта. Ӆын чета эплэӊ ӆэтут кавэрсэт. Йи хатэӆ йис лэтут вари, Йи хатэл тэм йисэн ӆэты ӆэтут вӓрит. Чи емэӊ хатӆа ар ханты, йаран, саран ёх ювит.</p><p>Мэӊ ёхӆув нух питсэт куӆ каверта ёх кутэн.</p><p>Ар мир йюхтыйис «Нянь-феста». Ар шанешкаит версыт чет. Ёх хуӆ лысэт, нюхәӊ путэт, арсыр воньчимэт, нянет!</p><p>Ёхӆув ястаӆат мэт, емэт ем вос чи ӆэтут каварты хатӆәтэн.</p><p>Галина Кечимова ханшам потар</p>

Лэтут емэӊ хатӆәт

Там веӆащ Шошийи уӆты мур хатаӆ харн ишакты нэпекн «Ямал-Медиа» рупитты лот эваӆт мойӆаптасаям. Хор: Вера Лонгортова

<div class="content-lead">Тата муң Порават нэ Елизавета хансапсы понӆув. Ӆув ай тэӆан аңкеӆа потрат туты нётаӆ. Аңкеӆ пиӆан ай куртат па вошат хуват яңхаӆ. Тухӆ ишан ащеӆан машинайн па ӆонщхопан тутӆыӆайңан. Хоты ханты мир уӆ, щит эӆты сэм пунсантмаӆ вуш эӆты уятаӆ. Нын ӆуңтаӆн, оша понаӆн, мосаң нын уӆапсайн эӆты моӆты ям верат нумаӆмиӆты.</div><p>Ханам ёх па ханам нэңат вуща уӆаты!</p><p>Там веӆащ мув еңитман шошийи уӆты рут мурат хатӆ постаса. Щи вер пеӆа номсэм тайӆэм.</p><p>Опем Порават нэ — Лилия па яйм Порават ху –Елисей.</p><p>Айи тэӆн ханты ясаңн, ханты сохн, ханты номасн, ханты рут юшӆув хуват яңхӆув. Хуӆ веӆман уӆты, каӆаңн яңхты рутӆув, ущты, ван таха хоятӆув пиӆн уйтантыӆув. Щутщаты порайн (отпускайн), еӆн уӆты ун вошата яңхтэвн, хунты мосӆ ханя, сай ясаң ястаты, муң кутӆувн рут ясңевн потарӆув. Потрэв ант ат моштаса.</p><p>Щиты унӆсам оӆаңан потарты. Ин ма хоӆна ашкуӆайн унӆтыӆам па ханты ясаңн радио хуват яйм па омем иты потарӆам. Вошн кепа уӆӆув, ханты ясңев ӆуттамев антам.</p><div class="content-new-image"><img alt="pic" src="https://854220.selcdn.ru/yamalnews/275507d2-9e6.webp" style="width:100%" height="438" width="780"/><div class="content-image_child">Муй верӆаман омем эӆты этаӆтыӆэман. Хор: Герман Наков</div></div><p>Вус хув порайи йис Пулңаватн хот ертэпев ӆыпийн урхот оматман тайӆув. Тови-ӆуң, ӆуң порайн — щит верантты лотэв. Опемн Поравт нэ Лилияйн этаӆтысаям, унӆтасаям нуй эӆты сорт пеңк эватты. Щи порайн ай, нияӆ-яртъяңкем таӆ усам. Юхат нуй ханшет ёшн ёнтсаман — нуйсах тэӆ. Муй верӆаман омем эӆты этаӆтыӆэман. Тухӆ порайн ёвра кепа тывӆ — яха туңматӆэв. Опем щи верат мостаӆ. Вуӆомем шуңатн ищи алиӆыса. Щишн ащем, яйм эӆты нуй кувщат ёнтылыяс. Вуӆомем шуңат эӆты нуй сах. Вуӆомем нуй сахӆ умщаӆаман тайсаӆы.</p><p>Порайн омем эӆты нуй сах ёнты номас вусман. Нуйт мосты щирн поныӆысӆы, минэман алиӆыман эватсаӆы. Ма туң яӆат оӆңа ёнтсам. Аяӆтайи нуй сахемн тывас. Хоӆна «Душа тундры» емаң хатӆ вантапса хоща этаӆтысэм. Юхат тови кепӆ эват ханшет ёнтсаман. Тови кепӆ ус пелкаӆн ханши хорас щуратӆаман. Ханши эватты кешийн опемн эвтамат эватсаят. Яха ӆуң сыс сах тэӆ ёнтсаман.</p><div class="content-new-image"><img alt="pic" src="https://854220.selcdn.ru/yamalnews/c2f11e58-e25.webp" style="width:100%" height="227" width="404"/><div class="content-image_child">Ма туң яӆат оӆңа ёнтсам. Хор: Герман Наков</div></div><p>Там веӆащ Шошийи уӆты мур хатаӆ харн ишакты нэпекн «Ямал-Медиа» рупитты лот эваӆт мойӆаптасаям. Вет таӆ моӆтас ус, хоты ма яра радио хуват потарты питмемн. Аяӆтайи ханты ясңем уңӆэма, номсэма, питас.</p><p>Уятман тайӆэм Порават ху ащем ясаң! Емаң хатӆ харн, хунты ишакты нэпекем мойӆаса, еша еӆамсаям этты. Атяемн-омеман, рутӆамн нётсаям. Рутӆам емаң хатӆ харн ёхтыӆысат ма пеӆаем вантты. Амтатлиӆат ма урңемн.</p><p>Герман Наков ӆэщатсаӆӆы</p>

Ханты уӆапса еӆащ тувман энмаӆӆаюв

Чит па тэм фестивален мэӊ вантсув. Хор: Галина Кечимова

<div class="content-lead">Ём-анҷәӽ тыӆәс ирйеӊ хатэӆн Тазовский вочен фольклорный фестиваль «Тут суӆтам» вос.</div><p>Воккэӊ ёх ем ясэӊ ястэсэт. Григорий Ледков па юхтыис па ар ем ясэӊ аккум Увэс ёха тоис.</p><p>Чет йис мончет, арэт, йекэт мэӊ ӆэисув. Имет йис онтупэт тусэт конкурса. Имет йис щирн йонтум ной сахӆаӆ, нюки вейӆаӆ, суминтахӆаӆ па конкурса тусэт. Ин руч кутэн ропитта ёх па ханшиин ӆомэтта сухӆәӆ вӓрит, чит па тэм фестивален мэӊ вантсув.</p><p>Ваули Пиеттомин хар хонэӊән чи емэӊ хатэӆ вӓри. Чет па арсыр шаит кавэрсэт. Моиӊ ёх хошум йиӊк па нёхеӊ ӆант ӆысэт. Нух питтум ёх конкурсэн мойӆупсаит вусэт.</p><p>Ем емэӊ хатэӆ музеин ропитта ёх варит!</p><p>Галина Кечимова ханшам потар</p>

«Тут суӆтам» верыӆыса

Карра порайна, нэпекатна ротат хансӆайт, щи пора эваӆт Вэненго рот – хантыйи йисат. Хор: ЯНАО губернатор пресс-служба

<div class="content-lead">Муң олты мувув сэңк вуӆ, щи арат каман мув суңна ар мир тэӆ нэңху ол. Пора порайна нэңхэт хув мувӆаӆ эваӆт па таха пеӆа кассаӆат. Ныңат вуртытэт юпина икиӆаӆ хоща олта манӆат.</div><p>Пора йи тахайна ант лайӆ, ивейна манӆ. Тохал порайна нэңхэт холна номлатта ант веритӆэӆ, хаӆща ӆув ротэӆ манас. Там потарна ма нынан Вэненго рот пущщи лаваӆта ӆытӆам, хаӆща ӆув мантсат па хоты там йисна энамты нэңхэт калаң савиӆат.</p><p>Ӆув аӆ кепа апращеӆ Вэнго оӆлимаӆ, ор яхат. Вэнго ики ханты эви вуртымаӆ. Ӆув рот мувӆаӆна тувмаӆ, Малыгин пролив хоща нави пухар хощаңна. Щиты олман эваӆт йик тайман. Хув яха олман антам, ийикеӆ маса хуӆ веӆты, маса па хоты сахат, антамми йиӆ.</p><p>Щикинща хоты верӆа, ның щи ищки мувна хыщта таңха ант ӆытта питаӆ па парта муваӆна манӆ, амэӆ па ащеӆ хоща, Приуральской мувна. Муваӆна кепа ёхтас, топ йикаӆ щиты щи ащеӆ апращна хыщас, Вэнго. Топ щи юпина, пора манман, масаң хан порайтна, нэңхэт холна ямас хансантта ант хасмеӆна, апращеӆ еса па хорпийи йис, кат буква нятман Вэненго пеӆа пиӆтащас.</p><p>Карра порайна, нэпекатна ротат хансӆайт, щитна амэӆ ханты олмаӆ ораңна, йикаӆ ищи хантыйи хансса, щи пора эваӆт Вэненго рот — хантыйи йисат.</p><p>Юрий Дмитриевич Вэненго олдаӆ хуват каӆаңна яңхал, Байдарацкой ор эваӆт ол. Таӆан тащӆ Зелёный Яр эваӆт ветъёң километра кемна ол. Ӆуңан Кев пеӆа каслиӆат, Хадата ёхан лар хощаңна лайӆат. Йис пора хуват ӆув ротӆаӆ щиящ каслисат, итта ӆув, яйӆ па нявремӆаӆ пиӆна щита яңхал.</p><p>Ӆув манэм еса олапсэӆ пущщи лаваӆтас: «Хой вантас хоты па щи ның алңищ тата олта питас, маса ях хоща па манас, маса анта. Топ ӆув йикаӆ ханты ясаң пеӆа онттасӆы, хантыйи ханстасӆы. Щитна муң итта хантэт, там мувна оллу.</p><p>Ротам алңищ туӆэм, холам йикам. Муң щирӆу каӆаңӆу пиӆна касӆыӆу, совхоз эваӆт ант лайӆу. Энамты олмемна хоты совхозна ропытсам, йикӆам итта община пеӆа ропытӆаӆ, каӆаң нёха маӆат. Ӆуңан лайты тахаю пеӆа катсат километра манта масӆ.</p><div class="content-new-image"><img alt="pic" src="https://854220.selcdn.ru/yamalnews/9f96d29a-d22.webp" style="width:100%" height="682" width="1212"/><div class="content-image_child">Муң щирӆу каӆаңӆу пиӆна касӆыӆу. Хор: Евгений Вэненго</div></div><p>Ма мули каӆаң савита яңхта волысам, хуткем таӆӆы йис волымем, топ масӆ ки, йикӆам парӆаӆӆам хоты мала-мала верта масӆ, ант ки ощӆат ӆув инщисӆат, партэм щирна оллат. Итта ӆув каӆаң савита вахтовый метод щирна яңхлат, кат ӆапат паращин хат вуйман манӆат.</p><p>Товына юхы йиты щирэӆ антам, йиңк вуӆ пастухат ивейна каӆаңӆаӆ хощаңна оллат. Ӆуң хуват кепа ищи щиты оллу, Уса ёхан хощаңна палатка аматӆу. Кат нэңху каӆаң савийӆ, па яхлу хойӆат, щиты щи оллу. Каӆаңӆу касаң хатӆ вантман тайта масӆат. Тащ охна манты каӆаңат вантта масӆ. Ӆув ки антамат, щитна хота кепа каӆаң пахл хыщас. Ӆув юпеӆна маса сат ветъёң, маса катсат каӆаң тута веритӆ. Вуӆ пелак яхлу ор хатна оллат, йиңк аӆӆат, хуӆ веӆӆат.</p><p>Каӆаңат мосаңңи йиӆат ки, сара халлат. 1990-мет таӆна, топа мос эваӆт тащу таӆаңты иӆ питыӆымаӆ. Итта ям, йиӆап партонат версайт. Йи укол аматӆа, топайӆ кимет хатӆ мули ямми йиӆ, нахэнтта тэӆна волыйӆ. Топ сияӆатына, мохты лечитта масӆ. Ант ки ӆэщатӆа, топайӆ хощ ӆайңитӆа па ищипа халаӆ, укол тэӆна ант нятӆ.</p><p>Товына манта питтэвна йиңк, ертат. Кев пеӆа ёхаттэвна ям, найң хатӆат. Пиӆңа щита сымаӆ, хув олман этӆат. Муң каӆаңӆу онтӆаман оллат. Топайӆаӆ хувви ант йиӆат, кев хоща яңхтэӆ эваӆт холлат. Орна олды каӆаңат па топайӆаӆ хувви энамӆат, ёрайи тэӆна йиӆат.</p><p>Муң каӆаңӆу ош хорпет, кев вурат хуват яңхта веритӆат, хата ӆытыт ол, щита манӆат. Каӆаңат киртэтна, ӆув отща ощӆат холащ манта масӆ. Сусн кепа па, манты порайи йитаӆна, ӆув мули ёсэӆ ощӆэӆ, вастада ант масӆат.</p><p>Ӆуңан каслиты тахайӆу, щит муң самна тайты тахайӆу. Щита муң ащиӆу энамсат, муң, итта па нявремӆу щита энамта питӆат. Ӆув па щита иёлты самӆаӆ таӆта питӆайт».</p><p>Муң мувув сэңк тащаң тамащ йис пора эваӆт манам ротатна, сэңк ям хонты нэңхэт номман тайӆэӆ хаӆща апращӆаӆ мантсат. Нявремӆаӆ апращӆаӆ тайм муватна самӆаӆ таӆӆайт па ащиӆаӆ вер алңищ туӆэӆ. Муң Юрий Дмитриевич эӆты ям ясаң китӆу, ноптан хув ат ол!</p><p>Вера Лонгортова хансам потар</p>

Самна тайты тахайӆу

Хувана понам умащ соӆаң хуӆые. Хор: Вера Лонгортова

<div class="content-lead">Хыщам ятан, Пулңават «Ямал Парк» щутщаты харна гастрономической фестиваль «Нянь Фест» манас. Кутӆаӆна ӆытыт каварты харна касты ораңна, Ямал хуват олты вуӆ васат па ай похлыет эваӆт олты мур тэӆ нэңху яха актащисат.</div><p>Тамащ фестиваль Ямал мув нэңхэт ораңна тампус мет алаң пус верса. Инесса Яунгад лавты ясаңна, ӆув ай олмаӆ тэӆна мув вантман яңхты нэңхэт ораңна тамащ касты харат верта ӆытыӆымаӆ. Энамты нэңхэт пиӆна ропытты тахайна лоңмаӆ юпина, грант хансты номасна ёхтам.</p><p>«Мет алаңна Алексей Конев тамащ фестиваль Ӆорвош район Ханты-Мужи куртна верта вутщийс, щи юпина муң щи идея онтасна тамащ вуӆ хар Пулңаватна ӆарпитсу, муң номассу, па районат эваӆт нэңхэт эӆты щёкат питӆ Ӆорвош район пеӆа ёхтаптыта, щитна тамхатӆ муң тата актащсу», — Инесса лавас.</p><p>«Нянь Фест» фестивальна нэңхэт кавартам каӆаң нёха, хуӆ, вур щанькайт ӆысат. Кимет хатӆ па «Казым-Нёӆ» команда эваӆт олты ныңат хуӆ эваӆт верам наггетсат ӆэщатысат, ловатӆна Ӆорвош район эваӆт ниӆ команда ос.</p><p>Вера Лонгортова хансам потар</p>

Ӆытыт кавартам касапса харэв нумаӆмиӆэв

Виктория нумаӆмас, хоты ветхощъяңкем таӆ сайн вуӆы хотан энмам эвет ёнтсат. Хор: Зоя Куртямова

<div class="content-lead">Там потар Виктория Лонгортова ханшас. Ӆув энамты нэ. Виктория нумаӆмас, хоты ветхощъяңкем таӆ сайн вуӆы хотан энмам эвет ёнтсат.</div><p>Ма потрэм туӆэм, хоты ма энаммем порайн аканян ёнтсам. Ма опращӆам хоӆ тащ тайсат, вуӆэң мохет усат. Щищан ащем, антем ищи вуӆы шавиман рупитсатан. Энапсам ма хотан, щи порайн эвет аканян хоӆна яма ёнтсат. Муң семьяеван няӆ эви энапсув: кат опем па апщем. Кашң нэ ӆув утща акань хир тайс. Аканьӆув камн сырат усат: сахаң, нуй сахаң нэңат, молщаңаң, нуй кувщаң ёх, кактулхат, онтапаң аканят.</p><p>Нумӆэм, муй арат эви хотан уӆӆув, хоӆ яха актащӆув, катӆэм урхот ӆэщатӆув. Норэтан тахты юкана васы охпатсох понӆув, камн сыр оляпан аӆ волиӆат. Онасат муң шай коробочкайт, щашканатан эӆты верыӆысӆув, вуӆы юкана тупа тащ актыӆысув. Онасӆув таӆаң бригада онас аратат. Касаӆты юшӆув камн таха хуват мантсат, норы хуват, пасан иӆпийн, осам хира ухаӆӆув хуңхаӆтысӆув — щит кеввурат матты усат.</p><p>Щи пуляң хой нэңӆув вош, курт хот омасӆат. Воӆӆы рущ хот иты тыйӆат. Аканьӆаӆ рупатая, ашкуӆая матты яңхӆат. Семьяйӆаӆ ӆув кутӆаӆан мойӆаман яңхиӆыӆат.</p><p>Щит шеңк ям пора ус.</p><p>Валентина Рохтымова инщассаӆӆы</p>

Ям пора ус

Ма вантсэм, хоты вуӆы тайты хоятат уӆӆат. Хор: Зоя Куртямова

<div class="content-lead">Максим Талигин айтэӆан Овкуртан уӆ. Там потаран ныӆа, хоты вош няврэм тащ хотан щутщаты щир эӆты нумасаӆ.</div><p>– Максим наң Кева янхиӆысан, хоты щита пора хайсан?</p><p>– Ма йи пуш Кев пеӆа яңхиӆысам акаем, Михаил Ильич пиӆан. Ӆув щи порайн Муши вош совхозан рупитас. Хоӆ тащат Кев тумпелка ӆуңан яңхӆат. Муң Саран мува ант яңхсув, Кев ӆыпийн усув. Ма вантсэм, хоты вуӆы тайты хоятат уӆӆат. Рупатаеӆ шеңк ӆаварт. Туп ӆув уӆапсаеӆ, ӆув сахатэӆ уӆӆэӆ, щёс щиран ант уӆӆат.</p><p>Щита мохет хоӆна хуӆ па веӆӆытэӆ. Ӆэты хуӆэӆ нэмаӆ кевхотхуӆ. Кевн ёханат оваңат, ун кеваңат. Туп маӆңат ищи тайӆат, щита ов роташак. Муң энамты ёх пиӆан щи ноптаӆты яңхиӆысув. Йи ху там пелакан хащаӆ, кимет хоятаӆ па пелка манаӆ, щиты кат ёхан сыӆ хуват йиңк овты щиран ныкӆы манӆатан. Хой ёхӆув няши пиӆан яңхсат.</p><p>Мет манэман ощхуль ус сояман хиран ряпушка ӆоват нялкат катаӆты. Хир ова кусы ярӆув, сойм кевн лап понӆэв, туп кутапан хирэв катаӆты места хайӆув. Щаӆта йи ху хир катаӆаӆ, хащам мохиӆув хира хуӆ воштыты каматса метрая нохӆы манӆат. Етна хащтаӆ хуват соймев ёхатӆэв, кашң хоята яңкем, ветхощъяңкем хуӆ ортӆэв — етн ӆэты тармиӆыйс. Щиты муң веӆпасӆысув.</p><p>Валентина Рохтымова инщассаӆӆы</p>

Хуӆ веӆты яңхсув

Муң кашң яӆпа этам книгая аматӆув, ӆаваӆӆув, умащӆыман ӆуңатӆув. Хор: Зоя Куртямова

<div class="content-lead">Яң таӆ хащас, хоты округеван ханшам книгайт ӆуңатты щира ӆэщатты питсайт. Редакционно-издательской комиссия щимащ рупата вераӆ. Ӆуңатты хорпия верты юпийн, книгайт округ нэпек ӆуңатты хотата па общественной организацияйт кутан лакки ортӆайт.</div><p>Округеван уӆты па Овс мувев эӆты книга ханшты хоятат еша тэрматыяты. Заявка щёхар тыӆащ оӆаңмет хатӆ унты туп китты рахаӆ. Там ссылка пуншты: https://dvp.yanao.ru/activity/42754/ па мосты щиран нэпек ханшты. Хоӆна муй хорпи нэпекат мосмитӆат, щита иса ханшман уӆ. Ханшам потрат, ӆуңтарат, потар шупиет книга щира ӆэщатман 2025-мет таӆан этӆат.</p><p>Таӆаңа верты тумпийн, хорамаң хоран понӆа, книга эӆты сохаӆ па ӆуңатты лыпатӆаӆ умащ ӆуңатты ураңан хорамаңа ӆэщатӆайт.</p><p>Ох сохаптаты ант мосаӆ. Китам рупатайт, касты харан рупитты комиссияйн вантӆайт па пирыӆайт, маты хоят нэпек ӆэщатты охан нётты.</p><p>Хащам сыс, катсоткем ӆуңатты нэпек ханшты хоят нётса. Ӆапатъяң пеӆа вет щёрас арат книга этас.</p><p>Книга ханшты ханты хоятыет, кум шитман нэпекӆан ӆэщатаӆн. Муң кашң яӆпа этам книгая аматӆув, ӆаваӆӆув, умащӆыман ӆуңатӆув.</p><p>Зоя Куртямова ханшам потар</p>

Ӆуңатты нэпек ӆэщатты вер

«Полярный круг» полуКасты ораңна ох сохаптата масӆ, тынӆ нёхамтыты километра эваӆт лайӆ. Хор: ЯНАО губернатор пресс-служба

<div class="content-lead">Ямал мувна «Полярный круг» полумарафон хоща хансантты регистрация пунсса. Ӆув щёхар тыӆащ алаңмет хатӆна Пулңаватна олта питӆ. Щита нёхамтыты ораңна холам таӆ эваӆт хансантта рахал, топ леккар хат эваӆт мос ант тайты нэпек вута масӆ.</div><p>Нёхамтыта ӆытты нэңхэт заявка унт ӆор тыӆащ 31-мет хатӆ маса сайт хуват китта веритӆат. Касаң участник хырна маӆа — щита футболка, юкантам номер, па па майӆапсы пормасат.</p><p>Нёхамтыты ёсӆ «Геолог» эваӆт пинтщаӆ па Матросова васхули, Объездной, Энамты нэңхэт проспект хуват манта питӆ, щиӆта «Парк Победы» хоща па финиш. Касаң нэңху медаль сытӆ.</p><p>Алаң таха вуты яхат па ныңат, хой 21.1 километра нёхамтаӆ, майӆапсы тынаӆ 55 щёрс эваӆт 100 щёрс маса. Хой 10 па холам километрая нох этаӆ йи щёрс эваӆт 18 щёрс маса майӆапсы тынэӆ. Мет ван дистанция, щит ветсат метра, щита майӆапсэӆ топ медаль.</p><p>«Полярный круг» полумарафона касты ораңна ох сохаптата масӆ, ветсат соӆкува эваӆт кат щёрс маса, тынӆ нёхамтыты километра эваӆт лайӆ. Щита акатты охат аса благотворительность хоща манӆат. Туняӆ 380 щёрс актыӆыса, аса «Ямине» фонд хоща китсайт мосаң нявремат ораңна.</p><p>Вера Лонгортова хансам потар</p>

«Полярный круг» полумарафон хоща хансантаты

Маты охаӆ няӆъяң пеӆа хут щёрас соӆкувая хойӆ. Хор: riapo.ru

<div class="content-lead">2024-мет таӆ эӆты, шукащты няврэм энмаӆты хоятат тыӆащ ох вуты тумпийн, йи пуш нётапса ох вуты верытӆат. Там пуш округеван, ярсот пеӆа йи семья щимащ нётапса ох ёша пайтас.</div><p>Йи няврэм кеша маты охаӆ няӆъяң пеӆа хут щёрас соӆкувая хойӆ. Катан, хуӆам муй аршак шукащты няврэм энмаӆты вуйман ки уӆ, вуты охаӆ щи арата энамаӆ.</p><p>Нийӆ таӆ эӆты па уншак мушаң няврэм хота вутыйн йи пуш сохаптаты охаӆ хуӆамсот пеӆа нийӆъяң кат щёрас соӆкува арата хойӆ. Няврэм яйӆаӆ, опиӆаӆ, апщиӆаӆ пиӆан йи хоттэӆа вутыйн, охаӆ ищи щи арат питаӆ.</p><p>Катпуш хиӆы няврэм энмаӆты пиращ хоятат тыӆащ вуты пенсия охаӆ па эӆатӆа. Кашң катпуш хиӆы няврэм ураңан няӆ щёрас моӆтас соӆкува охан сохаптаты питӆа.</p><p>Нётапса ох вуты заявление нэпек «Госуслуги» порталан, МФЦ, округ хоятат пиӆан рупитты Социальной фонд России отделенияйн ханшты, аӆ па почта хуват китты рахаӆ. Щимащ айкеӆ СФР региональной отделение пресс-служба мас.</p><p>Зоя Куртямова ханшам потар</p>

Йи пуш маты нётапса ох

Герман Романович Сандрин. Хор: Герман Сандрин

<div class="content-lead">Хащам таӆатан мет такан туризм верат туты питсув. Кашң хоят, хой ӆаңхаӆ, щимащ вер пуншты верытаӆ па мойң хоятат хорамаң мув сыӆэв хуват тутӆыты.</div><p>Вошатан па куртатан хоятат нюки па парщин хотат ӆонщӆат. Щий артан мойң хоятат ёхтыӆыӆат па шоши мир хоятат уӆапса вантыӆыӆат. Ӆувиӆаӆа иса умащ, хоты ханты хоятат уӆӆат, муй верӆат, муй хорпи пормасат тайӆат.</p><div class="content-new-image"><img alt="pic" src="https://854220.selcdn.ru/yamalnews/cfd301f2-dd2.webp" style="width:100%" height="720" width="1280"/><div class="content-image_child">Хорамаң Кев вурат вантты тутӆыӆӆам. Хор: Герман Сандрин</div></div><p>Щутщаты харата мойң хоятат хув тэӆан Герман Романович Сандрин тутӆыйӆ. Пулңават вошан акатӆаӆӆы па Кев пеӆа «Трэколан» хорңаӆӆаӆӆы. Каматса ясаң мув алиӆыӆыты вераӆ эӆты ястас: «Хус моӆтас таӆа йис, хоты ма Россия па па хон мув эӆты ёхтыӆыты хоятат щутщатыя тутӆыӆӆам. Еӆпи таӆатан ур хота тутӆысӆам, тащ шавиты мохиӆам хоща. Ин ант торастыты ураңан кашң хоятэв палаткайн уӆ, мосты пормасатан иса мийӆыӆӆув, анатан, путатан, оӆӆыты па лаңкисыты сохатан. Хоӆта машинайн па куран ёхатӆа, щи мувӆам щи алиӆыӆӆам.</p><p>Ванты, арпелак мохиӆув Питы щарс муй Алтай мува яңхиӆытэӆан экскурсияйн уӆӆыӆат. Там шоши мувеван ищи ар хорам, мосаң, хонна па ямшак. Пеӆңа па ищки онтасан арпелак ёхӆув яңхты ант верытӆат. Ант паӆты ёх антом йи пуш ма пиӆэман яңхиӆыйс. Там ӆапатан мойң хоятӆам Кева туӆӆам вонщамот, толах акатты, хуӆ веӆпасӆаты».</p><p>Нын кум шиттанан ищи Кева яңхаты, ямас щутщаты, юр акмаӆтаты. Тумтак ёшан, тумтак куран ёхӆы ёхтаты!</p><p>Аллина Тоярова ханшам потар</p>

Кева яңхиӆыӆув, ямас щутщиӆыӆув!

Софья Александровна Урун. Хор: Владимир Енов

<div class="content-lead">Ас нопатты тыӆащн 2025-мет таӆн Санкт-Петербург вошн уӆты Овс мират институт 95-мет таӆа питам емаң хатӆаӆ постатыя питӆа. Тата мосванан ма щи вошн усам па А.И. Герцен нэмпи Российской государственной педагогической университет хота яңхсам, мата тахая Овс мират институт ӆоңман уӆ.</div><p>Ванта, 30 таӆ моӆтас ёхӆы пеӆа ма щи тахайн па литературной факультет хоща Ленинград вошн усам па утаӆтысам. Ин па там кутатн умащ ус оша пайтты, муй щирн Овс мират институт тамхатӆ рупитӆ.</p><p>Щи ураңан ӆув куща нэңаӆ Софья Александровна Урун пиӆн уйтантысам па ямкем хув мин кутэмн потрэмисман.</p><div class="content-new-image"><img alt="pic" src="https://854220.selcdn.ru/yamalnews/a3cd746e-362.webp" style="width:100%" height="1438" width="2560"/><div class="content-image_child">Овс мират институт хот. Хор: Владимир Енов</div></div><p>– Софья Александровна, еша наң уӆапсаен эӆты матты айкеӆ муңева тува.</p><p>– Ма тамхатӆ Овс мират институт кущая уӆӆам. Там утаӆтаты тахаев катра порайт вуш эӆты А.И. Герцен Российской государственной педагогической университета ӆоңман ус. Ма, ванта, Амурской область мувемн сэма питсам па иса айтэӆн энампсам. Рутэм-щирэм эвенкат мир эӆты манаӆ. Ашкуӆа юпийн там Овс мират институтн вет таӆ сыс еӆӆы «учитель культурологии па истории» щирн утаӆтысам. Щиканща 2000-мет таӆн утаӆтаты вер тата щи сохнаптасэм. Щаӆта аспирантураем хоща па тата утаӆтысам. Юхат 2005-мет таӆэмн кандидатской диссертация нэпекем хоӆампсам па этнокультурология кафедра хоща ассистент нэ щирн мет оӆаңан усам па рупитсам. Щаӆта еӆӆы доцента йисам, кат таӆ ёхӆы пеӆа Овс мират институт куща нэңа пайтсайм.</p><p>– Муйсыр Овс мират институтн хоща ин тамхатӆ унты утаӆтыман тайӆаты?</p><p>– Муң катра порайт вушат эӆты па ин тамхатӆ унты утаӆтаты тахаева Россия мувев овс пелакн уӆты шоши мират тый утаӆтатыя вуӆув. Щи ураңан 28-кем Российской Федерация арсыр муват эӆты тый похат па эвет кашң таӆн ияха акатӆув. Иӆэм товийн аршак ай ёх ёхатӆ, кимет отэвн па еша шимаӆшак няврэм ликомӆ. Мосӆ ястатыя, хоты арсыр овс мират муң хощаева ёхатӆат. Имоӆты ишатн нганасан ёх ямкем ар ёхатӆ, тухаӆ порайн па ӆый иса антомат.</p><p>Там пуш муң хощаев хуӆам ительмен эви Камчатка мув эӆты утаӆтатыя ёхтас. Щит, ванта, шеңк ай мир. Нэмоӆты ишатн щи араткем ительмен ай ёх муң хощаев ант па ус. Щи ураңан там кутн муң туп аӆ нох аматсув щимащ воӆаң вера. Туп туняӆ таӆн институтэва 22 арсыр овс мират эӆты утаӆтатыя ай ёх ёхатсат. Мет ар хоят ӆый кутэӆн ёрн мирэв эӆты ликмас. Ванта, ёрнат хащам таӆатн арашак йисат. Щи ураңн туняӆ таӆ порайн 35 ёрн мир няврэм муң хощаев еӆӆы утаӆтатыя питсат. Кимет тахая тый ёхатты ай ёхӆув кутн эвенкат, хуӆмет тахая па хантэт ёхатсат. Мет ёхи хащам тахаята арпелак мет ай овс мират туп-туп итн муй катн питӆат.</p><p>Муң Россия мувевн, ванта, щи ай мир ямкем ар, щит: юкагират, селькупат, алеутат па па ёх. Щи тумпийн, эвенат, чукчайт, долганат, мата хоятат шеңк яма рут ясаңӆаӆн хошӆат, ӆый уӆты-хоӆты щирӆаӆ, хуӆ-вой веӆпас па вуӆы ӆаваӆты верӆаӆ туңа щира иса ин там хатӆат вуш унты тайӆат. Ма щирэмн, мосӆ ястатыя, хоты там йисэвн утаӆтаты верэӆ сохнаптатыя кематн шеңк яма рут ясаңӆаӆн ӆый кутэӆн иса потарӆат ёрнат па чукчайт, эвенат, долганат, нанайцат, ульчайт. Российской Федерация арсыр овс мув йират эӆты институтэва ай ёх утаӆтатыя щи йиӆат.</p><p>Няврэмат утаӆтаты ёхӆува-нэңӆува, аӆпа, ищиты щи хоятат ин хащсат, мата отат катра нынан Ленинград вош уӆам порайн утаӆтасат. Мосаң, па арпелак ху муй нэ пирщамасайт па антома там нови туром иӆпийн йисат. Туняӆ 2023-мет таӆн Мария Яковлевна Бармич сорма питас. Ӆув аратэӆн 90-мет таӆ ус па муңева шеңк ар онтас верас. Щаӆта па тата мосванан ищиты Нина Алексеевна Лыскова антома йис. Па ищипа муң хощаева шеңк ям ун хоятат уӆӆат па ай ёхат туңа щира па вещката там хатӆат вуш эӆты па еӆӆы уӆты-хоӆты щирэӆн сыр-сыр мосты верата иса щи утаӆтаӆат.</p><p>– Софья Александровна, муй арат няврэмат утаӆтаты ху ёх па нэңат нын иса тайӆаты, муйкем пох па эви кашң таӆ сыс Овс мират институтн утаӆтыйӆ?</p><p>– Профессорско-преподавательской тахайт хоща тамхатӆ вушатн институтн 40-кем хатнэху аратэӆн уӆ, сыр-сыр верата ай ёхӆув утаӆтаӆат. Студентат эӆты ищиты кашң таӆ сыс тата 240-кем па 250-кем пох па эви утаӆтыман тайӆув.</p><p>Арпелак ай ёх, ванта, магистратурайн па тухаӆ мортаң хоятӆув аспирантура хоща па тата уӆӆат. Щаӆта Овс мират институтэва, мата отэв А.И. Герцен нэмпи РГПУ таха хоща ханшман уӆ, муң кашащты договор нэпекат щирн ай ёхӆув па утаӆтатыя вуӆув. Ванта, кашң яӆап таӆн 50-кем бюджетной тахайн институтэв университет эӆты маӆа. Щиканща щитӆув эӆты 30-кем таха муң целевой поступления щирн ӆэщатӆув. Щёрас моӆтас заявления нэпек кашң пуш муң институтэва ай ёхат эӆты ёхтыӆыйӆ.</p><p>Туп щимащ похат-эвет муң хощаев еӆӆы утаӆтатыя вуӆайт, мата хоятат вещката па яма ӆый экзаменӆаӆ ӆэщаттыя верытсат. Ма нумастэмн, целевой щирн там пораятн ищипа кеншак муң институтэва ёхатты па еӆӆы утаӆтатыя. Щиканща мет ёхи хащам 20-кем бюджетной тахая муң Россия ӆоватан уӆты многопрофильной колледжат етшаптатыя ай ёх па тый вуӆув. Мет оӆаңан, ванта, щимащ колледжатн уӆты па рупитты кущайт пиӆан мин кутэвн и номас верӆув. Щаӆта педколледж таха етшаптаты похат па эвет муң хощаев экзаменат маӆат па тый утаӆтатыя щи сус пораятн ёхатӆат.</p><p>– Муйсыр специальность щирн нын хощайн тамхатӆ похат-эвет утаӆтаӆайт?</p><p>– Муң хощаев иса двухпрофильной бакалавриат щирн ай ёхӆув утаӆтаӆайт, щит: «рут ясаң па рущ ясаң», «этнокультурология па история» па ар щирн.</p><p>Там йисн па муң яӆап программайт ӆэщатсув, щит: «рут ясаң па китайской ясаң». Катра отат эӆты ищиты «рут ясаң па рущ ясаң» нэман тата хайсув. Щаӆта яӆап щирн па ин «этнокультурология па няврэмат дополнительное образование» таха ищи туса версув, ӆуӆан щита ай ёхӆув еӆӆы па утаӆтасайт.</p><p>Муң хощаев рупитты ху ёх па нэңат нумасӆат, хоты еӆӆы дополнительной образования верат ашкуӆаятн па мосмитӆат. Рут ясаң пеӆа таӆасты ай ёхӆув ищипа арпелак «рут ясңа па рущ ясңа» там йисн аратэӆн утаӆтатыя манӆат. Щи хоятат эӆты юхат ям няврэмат утаӆтаты мохет айн-айн тыйӆат.</p><p>– Софья Александровна, муй арат пох па эви там таӆн нын институтн ямсыева етшаптас па арсыр куртата муй вошата Россия мув ӆоватн рупиттыя манас?</p><p>– Мосӆ ястатыя, хоты кашң таӆн ищипа щи арат хатнэху, мата хоятат тата утаӆтысат, аратэӆн институт ант етшаптасат. Тухаӆ похат-эвет утаӆтаты верэӆ вощкасат па ёхи мантсат. Туп мет ошаң-щащаң ай ёхӆув тата яма утаӆтысат па диплом нэпек ёшңаӆаӆа вусат. Там пуш па аратэӆн 40 хатнэху институтэв етшаптас па Россия овс мув йирата ёхӆы мантсат. Муң хощаев, ванта, щи вер шеңк ям, хоты овс мирӆув похат па эвет мет оӆаң этаж хоща хоӆыена уӆӆат. Щаӆта па утаӆтатыя хуӆмет этажа кашң пуш нох яңхӆат. Щи вер тумпийн, ӆый уӆты овс мувӆаӆ эӆты охаң нётопсайн па кашң тыӆащ сыс иса китӆайт. Ма щирэмн, муң хощаев арсыр овс мир няврэмата ин уӆты па еӆӆы утаӆтатыя шеңк ям па умащ. Щи ураңан па щиты ястатыя вутщиӆам: «Муң хощаева еӆӆы утаӆтатыя ёхтаты!»</p><p>Владимир Енов ханшам потар</p>

Муй щирн Овс мират институт уӆ па рупитӆ

Евдокия Иосифовна Денисюк (Миляхова). Хор: Людмила Шульгина

<div class="content-lead">Там товийн ун кер тыӆащ 15-мет хатаӆан ар таӆ пучтайн рупитам ханты ими Евдокия Иосифовна Денисюк (Миляхова) 75 таӆ постас. Щи хатаӆан ма ӆув хощайӆ мояңа яңхсам па ар хошам ясаң ястасам.</div><p>Евдокия Иосифовна Ямал мув Ӆорвош район Касам-Нёӆ куртан сэма питас, ӆув хоттэӆ хоятӆаӆ эӆты потартас:</p><p>– Ащем Иосиф Никитич Миляхов, антем Мария Ивановна Неттина усңан. Аньтем Машъяӆор куртан сэма питас. Ӆув ащеӆ Иван Григорьевич Неттин Воӆаң Ляльн Ленинград вош пуңаӆн лялясас, щита антома йис. Ун опращем Никита Дорофеевич Миляхов ищи ляля манас, Берлин вош унты воракат воштас, ёхи керӆас. Ӆув имеӆ Мария Петровна (эви опращ нэмӆ Яврова) ӆаварт ляль порайн утща няврэмӆаӆ энмаӆтас па тарма рупитас. Ащем ун яйӆ Пётр Никитич Миляхов ляльн ушас. Аңкаңкем Матрёна Степановна Енова (Шульгина) ӆаварт ляль порайн Машъяӆор куртан хут няврэм энмаӆтас. Ӆув иса порайн ляльн парам рут ёхӆаӆ эӆты шукаң арат арыйс.</p><p>Антем-ащем — вуӆэң ёха усңан, тащан пиӆн касаӆсаңан, щишн ма Тэк куртан аңкаңкем пиӆн усам. Ӆув куйп шепан имия ус, патлам хот, Пупи якхот верас, вой арат арыйс, ёш посӆ тайсаӆы, щишн мир лекщитас. Ун ащаращем Степан Иванович Енов ищи шепан икия ус.</p><p>Муң щемьяевн ӆапат няврэм энмас: ма, Тамара, Антонина, Зоя, Раиса, Яков па Сергей. Ин ма, Зоя, Раиса па Сергей хащсув, хоӆыева щутщаӆув. Ӆыв Суматвошн уӆӆат.</p><p>Тэк куртан Дуся эвие нулевой класса манас, ванты, рущ ясаң ант тайс. Няӆ класс етшаптамаӆ юпийн Суматвоша китса, щита Дуся интернатн ус. Ашкуӆайн яма утаӆтыйс, хор ханшты верӆ самаңа тайсаӆы. Арсыр хораң касопсэтн касас па нох питыӆыйс. ВЛКСМ таха ёх ӆувеӆа ястасат, ӆуӆн ӆув еӆӆы хор ханшты вера утаӆтыты тахая ат манас. Туп Дуся ант уйтас, муй щирн щий манты. Ванты, аңкаңкеӆ туп 12 шойт арат пенсия ох ёша вус, щишн ант уйтас, муй щирн хиӆнэңаӆ ун воша китты. Щи ӆуңан Муши курт эваӆт опращеӆ Никита Дорофеевич Миляхов ёхтас па щий тутӆыса. Мушийн Евдокия пучтайн рупитты питас. Щи юпийн Тюмень, еӆӆы Екатеринбург вошңана карты кеӆ хуват оператора утаӆтыты китса.</p><p>1972-мет таӆ вуш эӆты нэпекаң айӆат нэ Ямал мув арсыр куртатн пучтайтн рупитас, нумаӆмасӆы:</p><p>– Ванты, пучтайн «Сберкасса» ох маты таха ус, щишн ма кущая уӆмемн ӆапат нёӆаң револьвер пошкан тайсам. Щи порайн ма ащема ун пумащипа ястасам. Ванты, айтэӆн ӆув пиӆаӆн пошкан па нёӆат ӆэщатсам. Щи тумпийн ашкуӆайн «Начальная военная подготовка» урокн автомат Калашникова эӆты нёӆат эсаӆты утаӆтысув.</p><p>Питӆор куртан рупитмаӆн ӆув Александр Михайлович Бальчугов пиӆн уйтантыйс, икия манас. Еӆӆы няврэмат сэма питсат. Татья эвеӆ 1970-мет таӆн Ӆорвош район Ӆоркуртан, Александр похӆ 1972-мет таӆн Ямальской район Мыс-Каменный куртан па Марина мет ай эвеӆ 1974-мет таӆн Новый Порт куртатн сэма питсат. Интам Евдокия Иосифовна 9 хиӆы па йи хиӆы тумпи хиӆнэңаӆ тайӆ. Нумаӆмасӆы:</p><p>– Няврэмӆам ӆуң порайн Суматвош район Тэк куртан щутщасат. Щита аңкаңкеӆ рущ щирн потартты утаӆтасат. Ӆувиӆаӆа шеңк умащ щита щутщаты ус, ванты, вонщамотат акатсат, хуӆ веӆпасӆасат па торн сэварсат.</p><p>Щаӆта ӆув щемьяеӆа ун шук ёхтас — икеӆ антома йис. Щиты Евдокия Иосифовна утща няврэмӆаӆ энмаӆтас. Ар таӆ манас… Ӆув Виталий Дмитриевич Денисюк пиӆн уйтантас, хунты ӆын ияха Суматвошаң ашкуӆайн утаӆтысңан. Ӆув няврэмӆаӆ кеша ащи юкана йис.</p><p>2016-мет таӆ вуш эӆты Евдокия Иосифовна икеӆ пиӆн Ёмвошн уӆ. Ӆув айтэӆн ёнтасты, тыйты вер самаңа тайӆ, щишн щутщаман иса порайн моӆты верӆ.</p><p>Евдокия Иосифовна ар таӆ пучтайн рупитмаӆн арсыр ишакты нэпекат, «Ветеран труда» воӆаң нэм тайӆ.</p><p>Ешак Евдокия Иосифовна, пучтайн рупитменан наң ар хоята ой па амат тусан — куртаң мира пищмайт, телеграммайт, арсыр газетайт, журналат тусан, ӆыв карты кеӆ хуват рутӆаӆ па ӆухасӆаӆ пиӆн потартсат. Еӆӆы хув йис, хув нупат няврэмӆан па хиӆыӆан пиӆн тумтака уӆа!</p><p>Людмила Шульгина ханшам потар</p>

Ар таӆ пучтайн рупитмаӆн мира щунь тус

Смолинат, Езинат, Новицкой рут ёх актащсат. Хор: Людмила Шульгина

<div class="content-lead">Щимащ вантопса хащам ятан «Торум Маа» нэмпи катра пормасат ӆаваӆты хотн ус. Щий Смолинат, Езинат, Новицкой рут ёх актащсат.</div><p>Там вантопса туты нэ Ирина Ксенофонтова ястас:</p><p>– Ханты Смолин рут Тунщинкурт эӆты, щит Ай Ӆэв ёхан хонаңан омасӆ. Там рут Антим Смолин эӆты оӆңитса па ин ихощъяң нупта йис. Щи рут хатнэхоятат — ям хуӆ па вой веӆпасӆаты ёх, там йис унты ӆыв щи вер яма тайӆат. Щи тумпийн там порайн щи рут хатнэхоятат арсыр рупатайт туӆат, туп йис уӆапсэӆ ӆаваӆман тайӆат.</p><p>Хунты Смолин рут хоща мойңа йис уӆапса ӆэрамтты учёной ёх ёхтыӆысат. Александр Александрович Дунин-Горкавич щи мувн рупитмаӆн ванкутн Смолин рут хоща мойңа яңхас. Щита тухаӆ ишан Владислав Михайлович Кулемзин, Надежда Васильевна Лукина па Ева Адамовна Шмидт усат.</p><p>Смолин рут эӆты айкеӆат Елена Григорьевна Смирнова (Смолина) актас, там вантопсайн ӆув потартас:</p><p>– Манэма айтэӆн йис рутэм эӆты умащ уйтты ус. Ма ванкутн ащем Григорий Прокопьевич Смолин эӆты инщассам. Ӆув, ванты, ая уӆмаӆн антиӆы-ащиӆы хащас, туп рутӆ эӆты яма уйтсаӆы. Ма 2004-мет таӆ вуш эӆты рутэм эӆты айкеӆат каншмемн киникайт ӆуңатты, катра нэпекат ӆаваӆты хотатн рупитсам. Умща йис, арсыр учёной ёх муң рутэв эӆты ханшсат.</p><p>«Торум Маа» музей хоща наука верат туты нэ Раиса Решетникова ястас:</p><p>– Ма хувн там хоттэӆ уйтӆэм, щишн рупитты кен ус. 2023-мет таӆн Елена Смирнова пиӆн уйтантысам. Ӆув Смолин рут верам ӆэраӆ аляс, хонна щий рутӆаӆ эӆты ханшас. Щи тумпийн арсыр хорат, ӆыв рутэӆ 30 моӆтас пормас уйтас, ин щитат ищи там вантопсайн вантты рахӆ. Там пормасат нэмат Ас ханты ясаңан ханшман уӆӆат. Щи тумпийн там вантопсайн Смолин рут воӆаң ёх уӆапса эӆты оша верты верытӆаты.</p><p>Григорий Прокопьевич па Мария Ефимовна Смолинңан Ас ханты хоятңан, ӆын рут ясаң яма тайсаңан. Елена эван потартас:</p><p>– Антем-ащем Ас ханты ясаңан потартсаңан. Ӆын йис потрат, монщат, арат уйтсаңан. Ӆын мадьяр мир учёной имия Ева Шмидта щитат потартсаңан. Там вантопсайн Ева Адамовна Шмидт эӆты пищма уӆ, ӆув Нови саңхам вош эӆты ӆынана ханшас.</p><p>Мойң ёх Григорий Прокопьевич Смолинан арыйм арат хуӆантсат. Щи юпийн Смолин рут имет «Кук-кук Най» ар арысат.</p><p>Ирина Ксенофонтова еӆӆы ястас:</p><p>– Григорий Смолин — ям веӆпас &amp;$! ус, уӆапсайӆ сыс 60 мойпар, 200 кураң вой, 105 нёхас вой па па войт веӆпасас. Овас мув эӆты 80 вуӆы тус. Ӆув ям па номпсаң амп тайс. Ин ӆув верӆ Поӆнават куртаң хуйн Александр Васильевич Аксёновн еӆӆы туӆа.</p><p>Елена Смолина антеӆ Мария Ефимовна Смолина (Езина) эӆты айкеӆ тус:</p><p>– Хунты Шаншвошн рущ Новицкой тащаң ёх шошмащсат. Куртат хуват яңхман хантэт эӆты хуӆ па тынаң вой сох ӆутсат. Щи порайн Ефим Иванович Новицкий Ай Ӆэв ёхан хонаңан омпсам Тунщинкурт эӆты Шаншвоша ма аңкаңкем Татьяна Ильинична Езина тус. Ӆын семьяеӆан ма антем Мария сэма питас. Еша усңан па катна мантсаңан, щишн аңкаңкем ёхӆы керӆас. Антем уна йис, Григорий Прокопьевич Смолин хоща икия манас. Ӆын ияха веӆпасӆасңан, монщсаңан, арысңан.</p><p>Григорий Смолин веңӆ Василий Кузьмич Аксёнов иса уйтам верӆаӆа утаӆтасӆы. Василий Аксёнов Ас ханты ясаң яма тайсаӆы, щишн ӆувеӆа Ас ханты ясаң утаӆтаты нэпек ӆэщатты нётас. Ӆув эвеӆ Ираида Васильевна Аксёнова «Ёмвош ёх» арыты тахая яңхаӆ, тамхатӆ муң «Унши юх ёхам хуват» ар арысув.</p><p>Людмила Шульгина ханшам потар</p>

Тунщинкурт эӆты йис Смолин рут ёх

Юрий Владимирович Андуганов мари мир учёной. Хор: Людмила Шульгина

<div class="content-lead">Щиты хунты Югра мувев эӆты воӆаң мари мир учёной потартас, филологической наукайт доктор, профессор ху Юрий Владимирович Андуганов. Ӆув ущ тыӆащ 6-мет хатаӆан 1949-мет таӆн сэма питмаӆ, туп нэпека ханшса — 23-мет хатаӆан. 56 таӆа ювмаӆн ущ тыӆащ 6-мет хатаӆан 2005-мет таӆн машинайн манман антома йис.</div><p>Там ванан муң редакцияева ӆув эвеӆ Марианна Юрьевна Андуганова мойңа ёхтыӆыйс. Муң ӆув эӆтэӆ Ю.В. Андуганов уӆапса эӆты иньщассув. Оша йис, Юрий Владимирович Башкирской АССР Калстасинской район Редькино куртан сэма питас. Тата ванан Танып ёхан овӆ. «Ӆув щи ёхан хонаңан каращ рэп эӆты Белая ёхан вантты мосман тайс. Ёмвошн уӆмаӆн ӆув Шапша курта яңхиӆыйс па щита ищи каращ рэп эӆты Ас пеӆа вантыӆыйс», — М.Ю. Андуганова ястас.</p><p>Ӆув антеӆ-ащеӆ Редькино куртаң ашкуӆайн няврэмат утаӆтасңан. Юра похие айтэӆн мари, хатань па рущ ясңат яма тайс. Ёӆн кутэӆн туп мари ясаңан потартсат. Юра Езвика ун щащеӆ пиӆн вонщамотат, толхат акатман унта яңхиӆыйс. Щи порайн щащеӆ эӆты йис потрат, монщат, арат хуӆантас. Хоттэӆ ёхӆаӆ нарассат, хорамаңа арысат, етнхотат альсат. Щишн Юрий Андуганов Арлан куртан 10 класс етшаптомаӆ юпийн мет сыры арыты вера утаӆтыты номас понас. «Мари мув воӆаң Йошкар-Ола воша ёхатмаӆн музучилищайн экзаменат маты еӆпийн ар мороженой от ӆэс, щишн арыты иса ант верытас. Вош хуват шушӆ, ещаӆт ӆухсаӆ Борис Шаймиев йиӆ, инщасӆ: «Наң хоты йисан?», ёхӆы Юра ӆувеӆа ястаӆ, щикуш арыты вера утаӆтыты ӆаңхас, туп турсыйӆ ушас. Щи порайн Борис ястас, Марийской пединститута ёхта!», — Марианна потартас.</p><div class="content-new-image"><img alt="pic" src="https://854220.selcdn.ru/yamalnews/8edaa99f-658.webp" style="width:100%" height="639" width="1138"/><div class="content-image_child">Ёмвош округ хоятӆаӆ пиӆан. Хор: Людмила Шульгина</div></div><p>Юрий Андуганов щита экзаменат яма мас, няврэмат рущ, мари ясаңңана па литературая утаӆтаты хуя йис. Пединститутн Маргарита Александровна Исаева пиӆн уйтантыйс. Айӆат катңан мой версаңан. 1971-мет таӆн нэпекаңа ювман Мари мув Старокрещено куртаң ашкуӆая рупитты китсайңан. «Ӆын тата пиращ Анна ими хотн усңан. Тата ма сэма щи питсам, щишн марийской Анна — Марианна нэмн масайм», — Марианна Юрьевна ястас.</p><p>Юрий Андуганов еӆӆы Петропавловск-Камчатской вошн армияйн служитас. Хунты Воӆаң Ляль порайн тата ӆув ащеӆ тохӆаң хопн яңхман служитас.</p><p>1973-1976-мет таӆатн Ю.В. Андуганов Эстония мув Тартуской университет хоща аспирантурайн утаӆтыйс, ӆув научной кущая воӆаң финно-угровед ху Пауль Аристэ ус. 1976-мет таӆ вуш эӆты Марийской госуниверситет хоща рупитты оӆңитас. «Щикуш учёной хуя йис, туп уӆапсэӆ хуват марийской свирельн нарасас па арыйс. Университет хоща айӆат ёх пиӆн «Рия-Рия» мари арат арыты таха ӆэщатас. Ӆыв муң мувев па па хон пелак муват хуват арыман яңхсат», — М.Ю. Андуганов ястаӆ.</p><p>Ӆув 1977-мет таӆн «Сложные слова в марийском языке» нэмпи диссертацияйӆ сайӆас. 1992-мет таӆн Тарту вошаң университет хоща докторантура етшаптас. Щи таӆн «Микросинтаксис марийского языка в историческом освещении» докторской диссертация хоӆамтас па филологической наукайт доктора йис. 2002-мет таӆ унты МарГУ хоща айӆат ёх утаӆтаман рупитас, диссертация нэпекат ханшты нётас. Щи таӆн Юрий Владимирович Андуганов Ёмвоша 2001-мет таӆн пуншам Югорской государственной университета рупитты вохса. Щикуш ӆув тата туп хуӆам таӆ рупитас, туп ар ям вер верас. Россия мувев утаӆтаты па наука верат туты министерствая пищмайт ханшас па вохас, ӆуӆн ЮГУ хоща шоши мир йис уӆапсая, литературая, ханты па охаль ясаңңана утаӆтаты ёх ат ӆэщатсайт, щи тумпийн аспирантура ат пуншса. Ӆув юрӆ онтасн щи верат иса тыйсат!</p><p>Юрий Владимирович Андуганов уӆапсэӆ хуват рут мари ясңаӆ ӆэрамтас, ар па хон пелак ясңат яма тайс, 130 моӆтас научной нэпек ханшас, ар хоята ун научной нэпекат ханшты нётас. Ӆув яма па вещката айӆат ёх утаӆтаты па наука щирн рупитмаӆн арсыр воӆаң нэмат па ишакты нэпекат хоӆамтас.</p><p>Югра мув шоши мирн ӆув ун пумащипа ясаңан ястаӆа па веккеша нумман тайты питӆа. Ӆув утаӆтам ёхӆаӆ Юрий Андуганов воӆаң верат еӆӆы туӆат.</p><p>Людмила Шульгина ханшам потар</p>

Югра мув самаңа тайӆэм

Щаха таӆта ныты питӆа, хота ар ятпи хотат омасты харат ӆэщатты рахаӆ. Хор: ЯНАО губернатор пресс-служба

<div class="content-lead">Ӆуң сыс сора етшаты ураңан нюрам мувев атн па ӆоӆӆыйӆ. Там йисан, камн мутра этам юпийн, мув поталыев иӆампа, мет сорашак ӆарыты питас.</div><p>Хошам муват ӆонщан лап питӆайт, ищки муватан мелка йиӆ, щарас йиңкат сорӆат, унтат ёсӆайт, войт уӆты мув каншман мув ӆарытман шушӆат.</p><p>Куӆа потам нюрам мувӆув утаӆтыты Индия, Пакистан, Иран па Россия хон муват эӆты айӆат ёх ёхатсат. Учёной хоятат пиӆан вантты мув харӆаӆ мортаӆасӆаӆ. Хор уна альты пормас хуват щира ӆэрапты ураңан, мерая вуям мув, йиңк, щита энамты торн ӆэрат, лыптат хошапата понтсат па патан усат.</p><p>Щаха таӆта ныты питӆа, хота ар ятпи хотат омасты харат ӆэщатты рахаӆ, юш верты, йинщты сыстам йиңк лотат каншты.</p><p>Ӆуң сыс ветъяң айӆат ёх ёхтыӆыйс. Щёхар тыӆащан хоӆна няӆъяң хоят ёхатаӆ. Кашң, ӆув пирыйм утаӆтыты рупатайӆ хуват верты вераӆ еӆӆы туӆ.</p><p>Зоя Куртямова ханшам потар</p>

Лух Авт

Публикации автора