Лух Авт
Нэмӆаӆ уятӆайӊан, рупатайӆаӆ этаӆтыӆайӊан
Тата «Дом ремёсел» хотан рупитты хоятӊан — Сергей Валентинович Аляба па Иван Ярославович Савицкий эӆты потрэм туӆэм. Ӆын кураӊвой па мувхор оӊат, ӆов па юх пиӆан рупитӆаӊан, туса пормасат нёхарӆаӊан. Хон мувеван па па муватан нэмӆаӆ уятӆайӊан, рупатайӆаӆ воӆаӊ вантопсаятан этаӆтыӆайӊан.
Яӆап антапкеӆ ӆэсятаӆ
Округеван верты вантопсаятан Сергей Валерьевич Аляба рупатайӆаӆ шияӆаты рахаӆ. Ямал па хон мувеван манты уйтантопсаятан мастер-классата ёхтыӆыты хоятат пиӆан ар хорпи пормасат вераӆ.
Хоты хасям таӆаӆ манас, муй яӆап от тыйс, потар тус: «Ин ма мувхор оӊат эӆты антапкеӆ верӆам. Хоӆ сюӊкӆаӆ, антапкеӆ оӆӊаӆ, кешеӆ па сотпаӆ па си оӊат эӆты ӆэсятман уӆӆат. Антапкеӆэм си етшаптаӆэм, сотпаӆ туп хасяс.
Кураӊ па мувхор оӊат эӆты ар хорпи пормасат хасям таӆан эватсам. «Тащ ӆарыйӆ» рупата ӆэсятсам, тыныты пормасат, уншак рупатайт ищи версам. Муӊ рупитты хотэв эӆты ӆапкайт пуншман уӆӆат, тохи тыныты вуӆайт. Яӆап таӆ сютсяты хатӆатан шоши мир уӆапсаева, таӆа постам пормасат ёхтам хоятат пиӆан версув.
Таӆ сыс ар вантопсаята, уйтантопсаята яӊхсам. Ас потты тыӆасян Словакия муван усам. Ун вантопса верса, рупатайӆув этаӆтысайт, кат тыӆась сыс ёхтыӆыты хоятат пормасӆув вантты верытӆат. «Русь хот» нэмпи тахайн хоятата мастер-класс масам. Хоӆна ашкуӆая тутӆысайм, няврэмата потарсам, муй хорпи пормас пиӆан рупитӆам, муй верӆам, антапкеӆэм алиӆысэм, эвиет па похат оӊат пиӆан рупитты утаӆтысӆам.
Си муван уӆты ёх ар пелак симась вер эӆты нэмоӆты ант уятӆат, нэмоӆты порайн шоши мир уӆапсаев эӆты ант хуӆсат, симась верам рупатайт ант вантсат. Муй иса инсяссат, пормасат умасьӆыман вантсат.
Округеван хасям таӆ сыс няврэмат пиӆан па рупитсув. Хой муӊ рупитты тахаева ёхтыӆысат, хой ишан муӊ ай няврэмат яӊхты хота яӊхсув. Товийн, Ӆорвош района Мужи воша Семён Севли пиӆан вохиӆысайман, тохи яӊхсаман. Вантопсаев сита тыӆась манас. Няврэмат пиӆан рупитсув, хоӆна ун хоятат ёхтыӆысат, нёхратсат. Симась вератты тахайт Овкуртан, Мужийн па Васьёханован уӆӆат. Няврэмат кружока яӊхӆат, пормасат эватӆат, йис верӆув еӆӆы туӆат».
Пормасат туса нёхраӆ
Иван Ярославович Савицкий па туса пормасат нёхраӆ. Верты вантопсаятан пормасӆаӆ этаӆтыӆайт, фестивалятан этаӆтыты рупатайӆаӆ нох питыӆыӆат. 2022-мет таӆ эӆты «Дом ремёсел» хотан «Ямальской косторезной ашкуӆайн» няврэмат утаӆтаты хоята уӆ, эвет па похат пормасат эватты утаӆтаӆ.
Ӆув эӆтэӆ, муй хорпи рупатайт, муй эӆты ӆувиӆаӆ вераӆ, потар тус: «Ма Ноябрьск вошан энапсам. Школа искусств ашкуӆая яӊхсам. Сита нёхратты утаӆтысам. Си юпийн Пулӊават вошан Ямальской многопрофильной колледжан культура па искусство отделенияйн «Декоративно-прикладное искусство па народные промыслы» специальность хуват утаӆтысам. Армия эӆты ёхатмем юпийн, академия етшаптасам.
Яртъяӊ таӆ «Дом ремёсел» хотан рупитӆам. Пулӊават вошн пормасат эватты хотан художник-конструктора уӆӆам. Ӆов па юх пиӆан рупитӆам, ун па ай пормасат нёхарӆам. Ар пелак рупатайӆам мувхор оӊат эӆты верман уӆӆат. Ӆув пиӆэӆан кеншак рупитты, ям рупатайт тыйӆат.
Верты пормасӆаман шоши мир уӆапсаев, няврэмат, уӆты мувев этаӆтыӆам. Кашӊ симась рупатайн няврэм аӊкеӆ пиӆан альӆам. Муй вой, муй хоят ат уӆ, симась сюжет уӆ.
Каматса рупата хасям таӆан версам. Иса кураӊвой оӊат эӆты эватсаӆӆам. Ӆув кутэӆан ай похлэӊки, Этаӆтасам, хоты похие сэмӆаӆ уна таӆман вантаӆ, хоты нэмоӆты порайн ант вантты вой ӆув ёшаӆ эӆты пурӆамтас. Там мосванан рупата версам, хоты макла пойтэк мосятты ӆэсятыйс. Яӆап таӆ сютсяты хатӆатан мастер-класса ёхтыӆыйм хоятат пиӆан «Хус», соха ющтаты брошь версув».
Альбина Тырлина ханшам потар
Авторы
Лух Авт
Темы