Няръяна Ӈэрм
Несэй сянакубцм’ тохолавы’’
Хэвы’’ ныланава’’ яляха’’на Саляӈгардахана «66 параллель» пирдырма миӈась. Округна’’ ханярид сёбар’’ ненэця’’ ма’’лыць. Небой поход пявы сянакубцханандо’ яӈор’’ сянакуць.
Время для чтения ~ 2 минуты
Ӈули’’ ненадо яхана мэць. Хубтахана ю’’ час’ пиркана ма’’люрӈаць. «66 параллель» ненадумда’’ма’ пиняӈы хэвхы ям’ салмравыць, табӈэ сертавыць. Тю’’у’ санава’ пирувна поӈгам’ ӈыдавыць. Пудяко таб’ ниня ӈэ’’ паркаси’’ волейболхана сянакуць. Не’’, хасава’’ харто’ помнандо’ пирдырӈаць. Ӈокханда не’’ 15 командам’ ма’’лавы’’, хасава’’ — 20.
Мань ӈэрм’ тер’’ няха’’ни сырманзь тодамзь. Саляӈгардахана нюдяко’’ ӈацекэхэ’’на манзарана’’, ненэй не’’, хаби’’ таняць. Сидя яля’ ямбан’ мячм’ моёпиць. Пудана яляхана сидя не няха’ Руфина няби Роза Ӈокэйха’ маниедамзь. Пыди’ ядембаданди’ помна ёльце варемди’ мэ’’ӈаханзь. Сидди’ маниеванзь небяди’ товэсь. Хэвхананда не нюнда ӈацекэця ӈамдысь. Небянда е’’эмня падта’’мам’ тэвравысь. Тикымда манэ’’лабтамба тёренась: «Мараӈга, мараӈга, нерня’!»
Помнандо’ ныланавадо’ таняць. Ханяӈы’’ ӈатенасеты’’, ӈани’’ тосеты’’. Тэри мэвана’’ сер’ Розам’ лаханако ня’’ӈадамзь:
— Ӈокханда тетри ненэць’ ӈобкана сянакобто’ серо’’ӈа. Няби няхаюд ӈани’ сидяха’ ӈэӈгуху’. Неновна ням’ сававна хамэдамба тара. Ӈахакуд лэтёдан’ мячм’ няр ладаӈгуда, нида. Ӈоб’’ торомбэй ӈэхэваб’’, хамэдёховаб’’, саць тоенанада яӈгова’ сер’ ӈэвы.
Ӈамдёдахана’’ тябихода то’’олхаваць. Пуна тамна сидя ӈэрм’ тер нехэ’ няю’ нята пэйнаць. Пыди’ ӈули’’ пир’’мэдинзь. Лыдо’ ямб’’ нехэт ва’’лёйркаханзь. Хабей’’ нехэ’ ӈэвэхэнзь. Екатерина Серасхова няби Елизавета Тайшина Приуральской район’ няд товэхэнзь. Тарця вади мэ’’ӈаханзь:
— Мани’ етри’ мякана ӈэда волейболхана сянакосетыни’, таремгав’ ниминзь хорпю’’, ӈани’ сава ӈэвы. Ӈопой ядембарка, табхад ӈэ’’ насадаӈга’’.
Пэвсюмняна намдаваць: хасев’’ поӈгана сямянхат Ноябрьск’ терха’ я’’авлавэхэ’, нехэт Пуровской райнхад товэхэ’ пир’’мэди’.
Автор: А. Яптик’ падвы
Авторы
Няръяна Нгэрм
Темы