Сидяӈг:  Аллина Яковлеваʼ тавы

<div class="content-lead">Маняˮ редакциянаˮ ӈобˮ хэвсахана ӈаˮ. Ӈобкана ӈопой манзаямʼ минреваˮ. Пыдоʼ хартоʼ хаби вадавнандоʼ паднаˮ, газетандоʼ нюмʼ — «Лух Авт». Хахаяда яляʼ ӈарка сояˮмаʼ ялямдоʼ ядабтамбиць. Газетандоʼ сидя юˮ самбляӈг поданда хаясь.</div>Ӈарка пэвдей ирыʼ 2000 похона тамальӈгы округнаˮ Ӈэвахы ерв хабиˮ газетадамдоʼ сертавандоʼ еˮэмня падартʼ пидтеˮмямда ӈабтась. Лимбяʼ ирыхына нердена газетадоʼ ӈадимясь. Хусувэй сиˮивхана хабиˮ хартоʼ вадавнандоʼ толаӈго пэйдаць. Тикыʼ нерцюна маняˮ «Няръяна Ӈэрм» газетанаˮ мюд ӈобˮ лабцадоʼ ӈадиберӈась. Ханзерˮ газетамʼ сертаба таравамда няднаˮ тухуць. Маняˮ нюртеˮэʼ табедамбинаць. Тедаʼ пыдоʼ мале тас паднанаӈэ хаяˮ. Юˮ поʼ ямбанʼ Геннадий Павлович Кельчин редактордандоʼ тарась. Газетанда нямна таремʼ лахана:— Нюртей газетаваˮ лимбяʼ ирыʼ матдомдэй яляхана ӈадимясь. Тамальӈгана ӈопойӈэ тада поʼ вэс паднадамзь. Сидяӈгадми Хабэча Хываревич Яунгад тамбсеты. Ӈамгэʼ пиркана Шурышкарской районхад Мужи хардахад Николай Никитич Нахрачёвмʼ паднанаӈэ няˮмадамзь. Пыда хаби вадаʼ хавна, луца вадавна падна ӈаниʼ пирˮӈадась. Тикыʼ хавна хуркариˮ лаханако, невхыˮ илеˮми, сё теневась. Ӈадьбянаˮ нянанаˮ манзаравада ӈарка ябась. Ӈобˮ поʼ манзараˮмахадани ненэцяндами маˮладамзь. Самбляӈгӈэ хаяваць. Ӈавнанаˮ газетаваˮ вадаваˮ мэˮманаˮ еˮэмня сертаваць. «ЛУХ АВТ»мʼ толабадаˮ хибяри ямдоʼ сянзь, невхы иламдоʼ нёда, хареˮ тэнзамдоʼ, паӈгодоʼ теневавандоʼ няюʼ табедамбинаˮ. Сидя юˮ поваˮ понхарт ни ханьˮ. Тедаʼ газетанʼ паднана ӈока. Ненэциенаˮ падвыдоʼ хартоʼ тэврамбидоʼ. Валентина Лонгортова, Юлия Накова, Нина Максарова, Надежда Лонгортова, Владимир Енов, Евдокия Серасхова, тикы ненэцяˮ нюбе хабиˮ сававна теневыдоʼ. Падвыˮ стихотворенийдоʼ, илеˮмидоʼ газетахананаˮ ӈадиберӈаˮ.Янаˮ терˮ хабиˮ газетамдоʼ сававна теневадоʼ. Хуркариˮ нюдякоˮ хардахаˮна, таӈоцяӈгаˮна, ты пэртяˮ ӈэсыхыˮна газетамдоʼ харвобтадоʼ. Ӈадьбятоʼ «ЛУХ АВТ»мʼ етриʼ толабидоʼ. Тарця сава иӈуд Евгений Ильич Ямрунʼ товысь. Ӈавна тикы серта таремʼ тензебтембидась:— Округхананаˮ тодоˮ тэнзˮ ӈэрмʼ терˮ илеˮ. Ӈокадоʼ ненэй ненэцяˮ, хабиˮ. Ненэй ненэцяˮ нинаˮ газетадоʼ таня, хабиӈэ яӈгу. Ӈадьбяни таʼ мальӈгана Геннадий Павловичмʼ хонрадамзь. Пыда нюртеˮэʼ нись харваркаˮ, таютась. Хабиӈэ тасалкурˮмахаданаˮ пуняʼ нись ӈаˮ. Мань таʼ мальӈгана Думаʼ депутатдамзь, ӈадьбянаˮ законˮ саирˮмана сертавандаˮ падарˮ няниʼ хаˮмыдаць. Понʼ нинась хамедамбюˮ. Ӈарка пэвдей ирыʼ 2000 похона округнаˮ ерв Юрий Васильевич Неёлов падаркана пидтеˮмямда ӈабтадась. Ватомʼ ӈэдарась. Тикыʼ тальняюʼ газетаваˮ ӈадибелыць. Тедаʼ газетахананаˮ ненэциедоʼ нёйдоʼ ёˮпюˮ. Сидтаˮ толабадаˮ ня ӈобкана паднадаˮ. Вадамʼ лэтрамбава — ӈулиˮ тоенана серˮ. Ненэцяˮ хареˮ вадамдоʼ мэпˮнандоʼ — тэнзадоʼ таня. Пыдараˮ, газетахана паднанаӈэ, вадамʼ минревандаˮ хавна, хабиˮ тэнзмʼ лэтрамбадаӈэ тарадаˮ. Тикы сехэрэраˮ пилиˮ нёдараˮ.Тедаʼ газетамдоʼ Аллина Кирилловна Яковлева няˮамбида. Пыда манзаямда техэ паӈгахаданда теневада. Таремʼ маˮнисяв: «Маняˮ ӈэрмʼ терˮ вадавна паднанаӈэ саць ӈарка манзаямʼ минреваˮ. Пявы сехэрэвнанаˮ илебей ненэцяˮ ядаӈгуˮ, ӈадьбянаˮ маняˮ етриʼ вареваˮ мэˮпанаˮ тара».Газетадоʼ тэнзамдоʼ нерняʼ пэрӈа. Хареˮ вадавнандоʼ паднанаˮ хареˮ пыхыдатоʼ едʼ ниˮ манзараˮ, пыдоʼ иландоʼ саирмʼ лэтрамбаваʼ няюʼ ӈарка таромʼ хаˮаврамбиˮ. Тад нерняʼ вададоʼ пилиˮ хайная.Марина Ярʼ падвы

Газетамдоʼ толабидоʼ

Сидяӈг: Марина Яройʼ тадтавы

<div class="content-lead">Мале танякуй похона ӈэрмʼ терˮ хэбидяˮ яˮ пидицяˮ нивандоʼ тэймандоʼ еˮэмня ӈопой падартʼ падыдонзь. Таняна ӈэдаˮ тэйпа нидоʼ ӈэдарамбюˮ. Сянда яӈэ толыˮ. Ненэй ненэцяˮ хэбидя ёдоʼ ӈаниʼ таняна падыˮ.</div>Таремʼ манзаранаˮ учёнойˮ сяӈок поˮ ненэцяˮ таняʼ ядэрмамʼ, хибя хэхэˮ яӈэ толёвамдоʼ тасламбиˮ. Хахаяда яляʼ Тасуʼ явʼ няд юнмʼ намдаваць. Таняна небоʼ учёнойˮ манзаравыˮ. Пыдоʼ тет хэбидя ямʼ («Сядэ хэхэʼ я», «Тадебя хэхэʼ я», «Тыʼ ӈэва седа», «Няхарˮ Ӈэвтеˮэ») сяндаӈэ нивыдоʼ таслаˮ. Маˮнимˮ, тарця серо ӈарка янаˮ законˮ саирмʼ нюракуць минрейдоʼ. Тедаʼ тикыˮ хэбидяˮ яˮ сяӈок пондоʼ ӈэвамʼ, хибяˮ мядʼ терˮ, еркарˮ ненадо яӈэ толёвамдоʼ тасла яˮамвыˮ. Ӈадьбята неры вадеˮмыˮ ёнаˮ сянда яӈэ нивыдоʼ падˮ.Тарця ӈавэ тасла яˮамвандоʼ пуд тад нерняʼ ненадо яхатоʼ ненэцяˮ таремʼ ӈодˮ ядэрць пиртадоʼ. Яʼ тебтмʼ нэкадпадаˮ сехэрэнʼ нёховабтоʼ еревˮ, хэбидяˮ ёдоʼ тамна илева сенасиˮ яханатоʼ ӈэӈгуˮ. Ӈопой, тедаʼ ненэй ненэцяӈэ хэбидяˮ ёдоʼ хартоʼ лэтрамбабатоʼ тара.Таремʼ мале танякуй похона Ямальской районхана ненэй ненэцяˮ хэбидя ямдоʼ хартоʼ мюмдедонзь. «Яʼ малʼ хэхэ» ненэй ненэциеˮ поӈгана сямянхат ӈарка хэбидя яӈэ таславы. Няданда ӈарка «Сэрˮ ӈо». «Яʼ малʼ хэхэ» ямʼ няюна ӈа. Таняна ты пэртяˮ хэбидя яндоʼ сиˮив мяˮ нямдо хартоʼ маˮлэйдонзь. Ханондаць. Тарабата сяхариʼ мюсертаˮ ненэцяˮ хэнумдорманзь тэворць пиртадоʼ.Хэбидяˮ яˮ илеваʼ ямбанʼ ненэй ненэцяӈгана сяндаˮ ненадоˮ яӈэ толыˮ. Хэˮлиʼ таняʼ ниˮ ядэрˮ. Тарця сероˮ хара ӈаниʼ тенева тараˮ. Сянда падаркана ӈэбатоʼ, нибатоʼ ненэй ненэцяˮ тенхана ӈаˮ.Марина Яройʼ падвы

Сяндаˮ хэбидяˮ яˮ

<div class="content-lead">Пудана поˮ ӈэрмʼ терˮ илаʼ нямна хуркариˮ кино сертабиˮ. Илмаˮ ехэрана ненэцяӈгана мэкадʼ тоˮолха. Тадӈоˮ ӈаниʼ тэнзˮ илмаˮ манэсоˮмахадандоʼ нянаˮ несэйвана сырӈаˮ. Илмаˮ сававна торомдамбиˮ.</div>Ханяӈыˮ кино ӈэрмʼ терˮ хартоʼ сертабидоʼ. Тикахана иландоʼ саирмʼ техэ паӈгхадандоʼ манэˮлабтамбидоʼ. Сяниˮ яӈорэйʼ ӈамгэхэртадоʼ пайӈэ ни ханасˮ. Пыхыданаˮ сававна кинохона тумдыбинаˮ.Тандаяркаʼ кино сертабадиˮ нямна ӈаниʼ ӈобˮ сава юнмʼ намдаваць. Мале танякуй похона «Мядʼ паӈг» нюбетамʼ тадтамба пяць. Тикамдоʼ техэ яханда нидонзь тэвраˮ, есьдоʼ сусавыць. Тедаʼ маˮнимˮ, Президентской грантʼ есь нядˮмяць киномдоʼ сертаба ёльцеӈгудоʼ.Выӈгана иленаˮ илебейˮ ненэциеˮ илеˮмямʼ падыбиˮ. Ӈэвахана мэнадоʼ Галина Ачембоевна Матарас, пыда «Минлей» организацияʼ нермбэртя. Режиссердандоʼ Владимир Тумаев тара. «Белый ягель» киномʼ тадтамбаванда нямна теневаваˮ. Кинохона ненэй ненэцяˮ сянакуˮ. Пыдоʼ таславы тохолковамʼ мэˮэмдавэйˮ. Ямальской районхы Юрибей яхаʼ няна иленаˮ ненэцие тадтамбавыˮ. Тикыʼ нямна Галина Ачембоевна тарця вадамʼ мэˮӈась:— Ненэй ненэциеˮ иламʼ мюданда манэˮлабтамбиваˮ. Ненэцяˮ хартоʼ иламдоʼ мэˮӈаˮ. Маямбиˮ, тэдорӈаˮ, ӈаворӈаˮ, лахарёдоʼ мэˮӈаˮ… Сяхариʼ хэвняд туртаˮ хибяриˮ илмаˮ манэˮлабтамбабатоʼ илмаˮ яӈгамдамбидоʼ, пайӈэ сертабидоʼ, ихиня тарця вэва. Тюку кинохонанаˮ маняˮ ненэй ненэцяӈэ хареˮ илмаˮ техэ паӈгахаданда манэˮлабтамбиваˮ.Киномдоʼ тюку поʼ нараʼ няна манэˮлабтаӈгудоʼ. Маняˮ ненэй ненэцяӈэ ӈулиˮ ӈатенаваˮ.Марина Ярʼ падвы

Едэй киномʼ манэˮтаваˮ

Сидяӈг: Марина Ярʼ тавдтавы

<div class="content-lead">Ненэй ненэцяʼ нянаˮ, Анна Павловна Неркагиʼ падвы няби яʼ панхана толаӈгудоʼ. Тедариʼ ненэй ненэцяӈэ поӈгананаˮ ӈобˮ ненадо паднанаваˮ. Тикы няваˮ тэнзанаˮ нямна ӈэда юнмʼ яʼ сярʼ нимня минреда.</div>Анна Павловнаʼ падвы «Белый ягель»мʼ ӈани яхаˮна вадеˮӈадоʼ. Лондонʼ няна книгамда ӈадимдеӈгуˮ. Россиянаˮ книга ӈадимдембада Ассоциацияхана манзараниˮ вадавна, тикы манзаямʼ поʼ ямбанʼ минревэдоʼ. Луцаʼ вадахад ӈаниˮ пареӈодаˮ вади тэволавы не ӈэрмʼ терˮ иламʼ техэ паӈгханда хамедаванда еˮэмня Анна Павловнанʼ ӈэдалёрмысь. Таняна ханзерˮ илеваваˮ торомдамбавы.Книгамдоʼ сие ниць ирыхына СШАхана ӈадиманзь вадеˮӈадоʼ. Пуна Канадаʼ няюʼ ядэлаӈгудоʼ. Тикыʼ нерцюна Анна Павловнаʼ падвы Испанияхана, Германияхана, Италияхана ӈадимдембидонзь. Нобелевской премиянʼ нерняʼ пэрӈадонзь. Падвэвнанда тамна киномʼ сертабиць.Пыдараˮ ӈодˮ, ненэй ненэцяӈэ, няндаˮ падвы ӈаниʼ толабидаˮ. Тикыдаˮ маняˮ ӈэрмʼ терӈэ илнаˮ нямна ӈаˮ.Марина Ярʼ падвы

Ӈани яхана толаӈгудоʼ

Сидяӈг: t.me/YANAO_official няд ханавы

<div class="content-lead">Округнаˮ ӈэвахы ерв нылынаваʼ яляхана теневана нита мядоˮмана ӈэдалёрӈась. Таʼ 2023 похона Пэˮ тэлˮмана мюсертаˮ мядʼ терхаˮ тэворӈась. Вэненго мядʼ терˮ</div>Пэˮ тэлхана сава юндоʼ пилиˮ со.Ерваваˮ нюртей яӈорэйʼ мякˮ ни тэворˮ. Тюку нида мале танякуй похона торомдэйдась. Тедаʼ тамна саць ненадо серˮ сидта таняʼ тэврась. Дмитрий Андреевич Артюхов илебей Вэненгаʼ мядʼ терхаʼ еяʼ мяд капиталмʼ миˮӈась. Округнаˮ тиӈгывна тарця 400-ӈэ толы.Несхаʼ, Дмитрий, Дарья Вэненго сидя нюдиʼ. Небяютиʼ-нисяютиʼ мякана илеӈахаʼ. Пыдоʼ малʼ Пэˮ нямна мюсерӈаˮ. Хареˮ тыдоʼ пэрӈаˮ. Тарцяˮ есь няˮамˮмахадандиʼ мятамдиʼ мяраӈгухуʼ, хартиʼ иламдиʼ пяӈгухуʼ. Ерваваˮ еˮэмнандиʼ сава вади хэтась:— Ямалваˮ сояӈгана ӈацекыˮ нямна ӈаниˮ ёˮ терˮ поӈгана нерняна ӈа. Мюсертаˮ ненэцяˮ сяхариʼ нюдоʼ ӈока ӈэсеты, тедаʼ ӈодˮ тарця. Ӈока хибяˮ невхыˮ иринатоʼ илаʼ саирмʼ нёдаˮ, тикы ихиня саць пои. Таремʼ пыдоʼ хареˮ тэнзамдоʼ ӈокамдамбиˮ.Еяʼ мядʼ капиталмʼ 2021 похона округнаˮ ӈэвахы ервʼ ватовна ӈадимдедонзь. Миртя — самляӈг юрˮ ёнарˮ еся. Тикандоʼ терӈэ ӈуˮ, еяˮ, хорˮ, ханˮ тараˮ.Марина Ярʼ падвы

Теневана няхата тэворӈась

Сидяӈг: Марина Ярʼ тадтавы

<div class="content-lead">Тыˮ ниць ирыхына Россия янаˮ ӈэвахыˮ ӈудонданаˮ Ӈэрм терˮ нерняӈы иламʼ савумдаваʼ няюʼ ненадо падармʼ падаць. Тикы яʼ мидыхыд хартоʼ яхаˮнатоʼ иленаˮ ненэциеˮ едʼ сертавы Концепциямʼ 2036 поʼ ёльцяндʼ нёдаӈгуваˮ.</div>Тандаяркаʼ хахаяда няхарˮ поˮ ямбанʼ ӈэвандаˮ серо пидтеˮмяханатоʼ мэйравыдонзь. Сямянхат таранаӈэ толёдаˮ — экономической, социальной серо нерняʼ тидхалембава, иле мэтаˮ ё тарулава, невхы илаʼ саирмʼ мэˮма, ты пэрма, ёрма, ханева.Ӈокханда илмаˮ савумдаваʼ няюʼ падартʼ юркад вата манзаи падвыˮ. Неноховавна таранаӈэ иле ёнаˮ лэтрамбавамʼ таславыˮ. Таремʼ хусувэй поʼ янаˮ сярʼ ний хабто ӈэвамʼ манэˮсартаˮ. Тикыʼ хавна ӈэрмʼ терхат вадамʼ минренаӈэ тэравыˮ нинаˮ яʼ индадмʼ, яʼ юрмʼ нэкалпадиˮ тасалковахана мэӈгуˮ. Едэй яхана манзара таслабтоʼ, ӈэрмʼ терхат хонаркодаˮ. Тыˮ хадырць яˮ, халямʼ хадабадиˮ ёловаʼ яˮ, хэбидяˮ, тамна ӈаниˮ илнаˮ саирмʼ нёда сертавыˮ ненадорка яˮ — малʼ лэтрамба таславыˮ.Сава нядˮмаӈэ ненэциеˮ сертавыˮ ӈамгэри, ӈамзи, халэ мирдапавамʼ падвыˮ. Тодоˮ Ӈэрмʼ ёˮ ӈэвахаˮна мэнаˮ ервˮ яндоʼ терˮ мирдападиˮ ӈавори хуркариˮ выставкахаˮна, ярмаркахаˮна манэˮлабтамбаӈгудоʼ. Вадавнандоʼ, таремʼ тэмдортидоʼ ӈоквортаˮ — ӈэрмʼ терˮ иландоʼ няюʼ мэˮманда есядамдоʼ недвопа пиртаˮ.Тикыʼ хавна Ӈэрмʼ няʼ ӈани яхат туртаˮ ненэциеˮ еˮэмня яӈга мядонзь ядамдоʼ сертаӈгуˮ. Ты пэртиˮ ӈэсыˮмана, ёртиˮ таӈоцяˮмана ӈэдалёртаˮ ӈобтикы таняӈгуˮ. Серодоʼ мале ӈахакуд таславыˮ ӈэӈгуˮ. Мядондаˮ ненэцие мядолабтамбаванʼ харванаˮ тикымʼ манзаяӈэ мэтадоʼ, таняд есядамдоʼ хомбаӈгуˮ.Сававна, таӈга илеваʼ еˮэмня ненэциеˮ илесь хардахаˮна юне намдорць мэта интернетмʼ, связьмʼ савумдамбаӈгуˮ.Тохолковаʼ нямна сертавандаˮ манзаяˮ:— ӈэрмʼ терˮ вадавна ӈэдаˮ толаӈгобцьʼ падыбава, школахаˮ ӈэдабтамбава,— едэй мутры нядˮмяць ӈэрмʼ терˮ вади лэтрамбава.Ӈэрм терˮ илаʼ саирмʼ лэтрамба сертавандидоʼ:— хэбидя я, илаʼ саирмʼ, невхы сё, лаханако лэтрава, теневава, мэˮма,— ӈэрмʼ терˮ вадавна лахананаˮ, паднанаˮ, хынотаˮ, лаханако мэтаˮ ненэцие тюˮуʼ тидхалембава, ӈэрмʼ терˮ вади, илаʼ саирмʼ тохоламбадаʼ учёной нядабава.Галина Окотэттоʼ падвыСидяӈг: Марина Ярʼ тадтавы

Ӈэрмʼ терˮ иламʼ савумдаваʼ вато

Сидяӈг: Лилия Артееваʼ ӈэдабтавы

<div class="content-lead">Ӈэрмʼ янаˮ ӈардавна хуркариˮ вырэйˮ, ваˮлёйˮ илебейˮ ненэциенаˮ таняˮ. Пыдоʼ Ямалнаˮ нямна Россия янаˮ тиӈгэвна сава юнмʼ минреˮ. Сёбарˮ, сёётэйˮ, таранаˮ, мелˮ ӈэдакыˮ. Поӈганандоʼ падтаӈгоди ӈаниʼ теневаваˮ. Ӈопойдоʼ — Лилия Артеева. Иланда, минрена манзаянда, мята терˮ нямна хонрамбивась.</div>Лахана нята нями мале ӈока поˮ ямбанʼ Ӈыдʼ школахана манзарась. Таняна сэдораваʼ, ӈавар пирембаваʼ урокахаˮна харадʼ терˮ ӈацекы тохоламбись. Падтаӈговаʼ нямна ӈэдаˮ теневабцудоʼ ӈобтикы няданда хомбидонзь. Манзаямда ёльце тидˮ минредась. Тамна «Движение первых» ненадо серкана тарась. Тохоламбадида яляʼ няюʼ ӈэдаˮ серкˮ тидхалембидась. Тедаʼ ӈацекыда сава ихина тензебтембасетыда.Харта сехэрэмда нёдаВэбаʼ ирыхыд иланда ӈулиˮ несэймась. Сита тотревʼ хусувэй хибяри лакриʼ иламда тамбирувна несэймда нида пиратˮ. Пыда харта выравнанда харвабтана, теневана манзаяримда пясь. Лилия таремʼ ибедорӈа:— Нюдя ӈэвани мальӈгэхэд падтаӈговамʼ харвабтав. Школахана яӈга ханяхавана тикы сертʼ нидамзь тохолкурˮ. Ӈопой, падтаӈговаʼ уроканаˮ минревы луци неваˮ сиˮми сававна табедамбасеты. Сита нядˮмяць ӈолепяхаˮна падтаӈгурць тухудамзь. Тикыʼ хавна хадани нюˮ малʼ хартоʼ падтаӈго пирӈадоʼ.Тобольск маркана тохолковани мальӈгана теневабцуниˮ тамна ӈокамдэйнась. Сямянхат нердена ӈолепяхаˮна падтавэми 2012 похона сертавась. Ненэй ӈарка манзаядни тасламбив. Тикыʼ пуд ханярина мэбˮни ӈодˮ, етриʼ падтаӈгурцетыдмʼ. Сертабадиниˮ сабе ненадоӈэ нисетын тасламбюˮ. Тэри ини харвабцоӈэ мэцетын. «Падтаӈгурӈадмʼ… Ӈока янаˮ терˮ таремʼ пирӈадоʼ. Нядандоʼ ӈамгэхэна яӈгадмʼ? Ненэй падтаӈгодаˮ — юнета ненэцялиˮ. Мань ӈадимдевандами яӈгу», — таремʼ ими ядэрцеты. Сейми пинаркасеты, ихинани тарця вадахат тосаркасетыдмʼ: «Таросядамʼ сертаби».Яляʼ няриʼ сырӈаӇобаӈгуна ӈопой табекомʼ намдадамзь: «Мелʼ ненэцяˮ, тамбирувна мародаˮ нёдаˮ ӈаˮ. Теневабцудаˮ пыдарираˮ еˮэмняндаˮ тавыˮ ниˮ ӈаˮ. Яʼ тиӈгывна ненэциеˮ иламʼ савумдамбаванда еˮэмня мэˮэйдаˮ». Ти, тикахад хамедав: «Хибяхав сертавэми манэˮманда серʼ сава иӈутʼ хаˮмаӈгу, тарэнзяда савумда». Харˮни пыхыдами хонрадмʼ: «Хибяхав манзаиниˮ вэваӈэ таслабта, падтаӈго ӈэвадаӈгудмʼ? Ӈамгэхэв илаӈганани несэймда?». «Яӈго. Хуркари ӈэбта ӈодˮ, падтаӈгуртадмʼ. Ӈаниʼ серʼ яˮмав». Таремʼ харвабтана манзаями илни серӈэ таслав. Падтавыниˮ мирдапин, таняд есядами хомбидмʼ. Сертавыниˮ ненэцяӈгˮ интернетʼ мутравна ӈадимдембин. Таняна группами таня. «Лилия Артеева|Художница с Ямала|Lili ART» нюбеˮӈа. Тикымʼ нядˮмяць падтавыниˮ манэць пирӈаˮ. Ӈамгэхэвмʼ тэмдаванʼ харвабто, паднаˮ.Мелʼ мята терˮНебями — Антонина Сергеевна Артеева. Харта еркарада — Ӈокдэтта. Иланда ямбанʼ сиднаˮ ембапасеты. Пибинаˮ, мальцинаˮ — малʼ пыдаʼ манзаида. Сэдора, паркола хадами Светлана Ходевна тохоладась. Нюдя ӈэванда мальӈгэхэд нюдя ӈавори, ютъи сэдыба табедамбавэда. Пивахавˮ, панэхэвˮ мале школамʼ ёльцеˮмахаданда пявыда. Мирдападиниˮ поӈгана небяни сэдъяˮ таняˮ. Ханяӈыдоʼ тодоˮ тэнзˮ ӈухукоˮ. Ябтоˮ, нябыˮ пыяхат сертавыˮ хавна едэйˮ сянако сэдыби. Лапкахад тэмдавыˮ «кукла» ненэй ненэцяндаревʼ ембапида. Ной паныдоʼ, ниʼ индоʼ, ӈэбтодоʼ малʼ ненэйрахаˮ. Хусувэй сянакода ӈани сянакохоˮтата яӈга, ӈобкарт ӈобˮ тоˮолсада яӈгу. Ӈаркаюмʼ не нями мале ӈока нюʼ небя. Ӈобтикы мелʼ не. Нюкцида, вэсакода не няни сэдвы мальци, пиби мэˮӈаˮ. Падаркана падтаӈго теневабцода нянанда ненэй ӈавори сэдыба нядˮмаӈэ тара. Ямалʼ сояˮмаʼ яляхана пыдиʼ сэдъидиʼ ӈаниʼ мирдапинась, выставкахана ӈобтикы манэˮлабтамбинась.Манзаита нямнаПуданаˮ падтамбадита нямна Лилия таремʼ лаханась:— Тедаʼ сертабадиниˮ сырэй ялэˮ нямна ӈаˮ. Сюртявӈэ матормыˮ пя латакоциˮ нина падтаӈгурӈадмʼ. Неноховавна харпоˮ ялэˮ падтаˮминиˮ ӈокаˮ. Ханяӈыниˮ нюдямбойˮ, ӈаниниˮ ӈаркамбойˮ. «Сделано на Ямале» ярмаркахана янаˮ терˮ савуˮядонзь. Тедаʼ мале янамбовна Ты пэртиˮ ялэхэˮ хамекудмʼ. Таняна тэмдортаˮ ӈока ӈэсетыˮ. Ненадовна нядˮмаӈэ интернетхана минрена группами мэˮӈадмʼ. Таняд тодоˮ я терˮ сиˮми хомбиˮ. Харвабцутоʼ серʼ тэмдавандадамдоʼ тэрабиˮ. Ти, тарця манзаямʼ илниʼ сехэрыʼ ненадумдаˮмаӈэ мэˮӈадмʼ.Галина Кинчинаʼ падвы

Ӈэрмʼ яваˮ падтамби

<div class="content-lead">Тазовской районхы Ӈэдяʼ хардахана ненэй ӈацекэхэна манзарана Людмила Мэбетавна Ярмʼ лаханако няˮӈадамзь. Пыда ӈарка пэвдей ирыʼ пуданаˮ ялэˮ пиркана ӈацекыта нямна вадамда мэˮӈась:</div>— Маняˮ ӈацекынаˮ интернатхана ӈулиˮ сейдоʼ нярканаˮ. Мале сянʼ яляʼ хэˮмяхад ханяӈыˮ мякандоʼ пяӈгудоʼ. Сиддоʼ мятоʼ терˮ хосаяӈгуˮ. Маняˮ ӈахат школахана тохолкурˮманаˮ мальӈгана поʼ ямбанʼ школахана мэсетываˮ. Ханяхартʼ ниваˮ ӈэдалёрцетуˮ. Таʼ мальӈгана таремʼ няби яʼ пананʼ есяʼ ханхана ӈэдалёртаˮ яӈгосетыˮ. Тедаʼ ӈацекынаˮ мале теневаˮ: «Сывʼ мякандоʼ пяӈгудоʼ». Мань тидхалембадиниˮ пуданаˮ тохолковаʼ яляхаˮнатоʼ варемдоʼ мэˮӈаˮ. Тохолковаʼ серодоʼ вэнзерˮ мимбанандоʼ сиддоʼ ниˮ ӈэдараӈгуˮ, ерваваˮ небянадоʼ-нисянадоʼ няць лаханакурта. Тарця яӈговаʼ еˮэмня тедаʼ ӈахакуд варемдоʼ мэˮӈаˮ. Таремʼ ӈодˮ ӈыхы яхана иленаˮ ненэцяˮ нюдоʼ нидоʼ хосаясетуˮ. Пыдоʼ интернатхана илесетыˮ. Сянмбой ӈацекы хаюрцеты. Пыдоʼ еˮэмняндоʼ ӈобтикы хуркариˮ мэкадˮ ӈавэ сертабасетываˮ.Ныланаˮмахадандоʼ ӈулиˮ ехэрана ненэцяӈэ турцетыˮ. Хойхана яляʼ няʼ ӈэда пэдёдамдоʼ нэкалпиˮ. Сава иӈутʼ хаˮморӈаˮ. Ӈаябаддамдоʼ ӈамдаˮ, тэхэˮнатоʼ мэӈгуˮ. Мятоʼ терˮ хэвхана идоʼ таӈгаӈгуˮ. Пунахав тамна самляӈг ирыʼ хэˮмяхад ӈаниʼ няхатоʼ пяӈгудоʼ.Тедаʼ интернатхананаˮ иле лохонаˮ мюйʼ паскойӈэ сертабиваˮ. Хадымʼ нултаваць, хуркариˮ сомбойˮ еӈглюс ӈыдаваць. Тикынаˮ малʼ ӈэбатоʼ харˮнаˮ сертабинаць. Ӈацекыниˮ тарця сава ваˮлеро ӈанэдамбавамʼ харвобтадоʼ. Хусувэдоʼ ӈамгэхэв тарана иӈудмʼ хэтыби. Тадриʼ Ӈэрмʼ сей ириваˮ Ӈэдяʼ хардавна ӈаниʼ ӈадимда, тохолкодаˮ ӈацекынаˮ ӈудаʼ терад тэвраӈгу. Маняˮ хуркариˮ сё тохоламбиваˮ, имбытадваˮ сэдыбиваˮ. Пуна тикынаˮ серˮмахаданаˮ ӈобкана Ӈэрмʼ сей ириваˮ ядабтаванзь пяӈгуваˮ.Таремʼ Тазовской районхы, сямянхат ӈыхы яхана ӈэда Ӈэдяʼ хардахана ты пэртяˮ нюˮ едэй помдоʼ ядабтаванзь ӈанэкурӈаˮ.Марина Ярʼ падвы

Сырэй ныланавадоʼ

<div class="content-lead">Маня’’ ӈэрм’ ява’’ саць паской. Няби я’ панхана Ӈэдя’ тер’’ выӈгана хаерта сэв ӈодь сэван’ ӈадимя. Редакцияна’’ сава ня Данил Марюй вадам’ ӈэдарась.</div>Данил хахаяда яля’ харе’’ соя’’ма яханда тэворӈась. Пыда манэ’’мыда няна’’ ӈэдарэйдась. Ӈэдалёро’’мида тарем’ ваде’’ядась:Нини’’ мядодо’ Ензя’ няна ӈа’’. Хальмер’ Седе’’э’ хардахад ӈэдалё мале хубта. Тев’ ёльцяӈгана саць теци. Вэнзер’’ ембдёховаб’’ пивня ядэрма’ то’’олха ни ӈа’’. Ненэй ненэцяӈгав’’ ёря мальцяха’’нато’, со’’окаха’’нато’ ӈамгэхэрт тецьда сиддо’ ни табламбю’’. Пихиня ӈамгэхэв манзаидо’ етри’ танясеты’’. Нито’ мядо’’мана’’ ӈэдалёрӈа’’, поёрӈа’’, ханяӈыдо’ тамна халяда’’. Таняна мэвани мальӈгана ялянда сэв я’ пан’ нимня ӈадибелыць. Тад нерня’ хусувэй яля’ хаерта тю’’у’ пэртада, тарем’ янамбовна ибаӈэ ханда.Пыдара’’ ӈод’’ Ӈэдя’ выӈгана ханзер’’ илевамдо’ ӈани’ манэ’’ӈара’’. Тюку’’ сидяӈг’’ таняд тэвравы’’.Марина Ярʼ падвы

Ӈэдяʼ выӈгана

Татма: Андрей Пяк таттамы

<div class="content-lead">Ӈашкиуде» неԓьшут чики дяԓямтоӈ ӈэтаӈатоньш. Куԓкаԓи» мэкат паныдю» мэш утренникан тоӈаш». Пюԓ дяхана ӈайта ассоциацим «Ямал-потомкам!» няш ӈашкиуди» праздникат шеԓтаӈаш». Таԓкахана диԓина» ӈашкиуди» диԓюнатуӈ мят майпёш тоӈаш». Ӈашкиуди» хомана ныптакомаӈ мэт праздник’ шеԓтамы» неԓьшут ӈанатамэт.</div>Ӈыдихийтуӈ шеԓ ӈашки» утренник’ минԓеш ЦНКхана мансԓанна» шичитоӈ нятапиш». Пы’тоӈ ӈашкиуди» хыниԓмаӈ мэты» вильта шутпяԓс шеԓтаӈаш». Ӈашкиуди» шанат шана’кохона» шана’куш», кынуӈаш», поӈкнатуӈ мянаԓяш». Чешча вайсыку ни нюнта няӈ утренникан тоӈаханьш’. Ӈашкиуди» тохоԓамытуӈ стихотворенитуӈ вачаӈаш», нятуӈ ӈучи» ня’ампёш катукуӈ чемна таԓаӈаш». Чуки похона ёлкахана дюԓкат ва’та» ӈашки» мэӈаш». Мятуӈчеԓ» ӈука нешади» ню» камна нешанатуӈ СВОхана мэна» ӈашкиуди» утренникан тоӈаш». Таняӈ томы» хомана майдят. Шана’кош хитамахататоӈ ӈашкиуде» чупей детыпуӈ дет ӈайта мячисы» — подарки ня’амӈаш».Маня» Пюԓ дяханана общественное’ движение «Ямал -потомкам!» няхаԓдю”кат ва’та пуӈ ӈокна мансԓаӈахаӈ. Нешади» дет ӈайта празднику» шеԓтапёш пдицахана мансԓанна» пон нятакошту». Деты пуӈ неԓьшуна Пуровский’ районхана мансԓанна» ТЭК дет тонԓюта» предприятии» чупей ӈашки» подаркит тэмтапёш нятакошту».Андрей Пяк патмы

Майпёш шана’куш”

Фото: Сё мэта сей няд ханавы

<div class="content-lead">Мале сян по’ тяхана ПОЮЩИЕ ГОЛОСА ӈась. Теда’ январь’ иры’ 1 яляхад март иры’ 1 яля’ ӈэсонд’ ненэця’’ ӈани’ видео сертаби’’. Ненэй ненэця’’, хаби’’, тасу’ хаби’’, ӈысма’’ мал’ конкурсхана мэ’’.</div>Сёётэй’’ ненэця’’ тюку конкурсм’ ёльце ӈатевэдонзь. СЁ МЭТА СЕЙ терм’, Саттане Ӈокэйм’ хонрамбидамзь. Пыда Хальмер’’ Седе’’э’ хардахана иле. Харта соя’’ма яда — Сёяха. Хуркари ненэй сё, иринда сё мэцеты. Теда’ ӈани’ хыно’’манзь мэ.«Поющие голоса»‘ нямна Саттане тарця вади мэ’’ӈась:Харе’’ вадан’ сё тидхалембава конкурс 2019 похона ӈадимясь. Тамальӈгана Тюмень маркана тохолкудамзь. Маня’’ «молодежка»‘ терӈэ ӈобт’ ма’’лываць. Баста’ сём’ ненэй вадан’ ӈарханда падаваць. Хусувэй я’ тер харта вадавнанда вадида сертабидась. Пуна ӈобт’ тасламбиваць: ӈамгэ вада ханзерарка сомбоковна хэтаб’’ сава ӈэбтав’’. Видеори сертавдавэй’ хаись. Тикахад Едэй по’ някуна ханяӈы’’ нина’’ мякато’ хаяць.2020 похона конкурс ӈани’ танясь. Тет вадавна сертаба пядонзь. Тамальӈгана ма’’нидам’’: «Тедахав’ нивандархав пирас’’, хуркари ӈэё». Сёкоцяхавахаюни таняӈаханзь, сидя сём’ сертадамзь. Теда’ тикы сёхоюни мэ’’ман’ нихиюн харва’’. Ӈанисэй сём’ пада тасладамзь.Тикы’ пуд ими ядэрӈась, ӈани похона таняӈгува. Ӈани похона ӈамгэхэрт яӈгусь. Небо’ ӈани’ мадамзь: «Самляӈг по’ хэ’’мяхавахад нинякы ӈадимд’’?» Самляӈг по’ хая — ӈадимя.Тедахав’ мань маймбидм’. Тюку конкурсм’ мале ӈока ненэця’ ӈатевэда ӈэванӈгабя. Ненэй вадавна сертавы’’ сё’’ мале ӈока’’ ӈэӈгу’’. Си’’ив яна’’ тер’’, хахаяда ё’’ тер’’ мал’ ма’’лёда’’.Сава юнм’ намдвани сер’ ими таминда ядэлыць. Анна Асти’ сём’ ненэй вадан’ падван’ харвадм’. «Homay» сё ӈани’ сава. Сё мэта Тадебя’ «Сэр’’ мерцяда» таня. Тикым’ падаб’’, ӈани’ сава.Саць тоенанада харе’’ вадан’ луца’ сём’ тидхалембава. Ханяӈы’’ вада’’ маня’’ вадавнана’’ хэтнана’’ ни’’ӈа’’.Ӈамгэ серта тара? Нерня луца’ вадавна, тамна ӈани’ ӈамгэхэв вадавна ӈэда сём’ ненэй вадан’ падаӈгун, тидхалеӈгун. Тикы сёмд видеон’ падхая мэтар. Пуна харт «Вконтакте» страницахананд ӈадимдеӈгур (страницамд нэсь нён юр’’). Тикахад #поющиеголоса2026 хештэгм’ ӈабтаӈгун. Хонраван’ харвананд таняб’’, конкурсм’ минренаха’’ падан’’.Автор: Анна ЯптикФото: Сё мэта сей няд ханавы

Сё мэта'' пирдырма

Сидяӈг: Андрей Ткачевʼ тадтавы

<div class="content-lead">Ӈарка пэвдей ирыʼ юкад вата няхаромдэй яляхана Ямалнаˮ тодоˮ хардахаˮна Едэй помʼ ядабтаванзь мядотоʼ ядэлавиˮ поӈгы ялэмдэйдонзь.</div>Луца яляʼ пардаркана понаˮ ваераварида хаи. Саляӈгарданаˮ терˮ «Геолог»мʼ нюбета харадʼ хэванʼ маˮлыць. Тикахана хэбидя яляʼ нерня ӈарка паской хадымʼ, салабахад сертавыˮ ӈаводикы ӈабтавыць. Ханяӈыˮ мядотоʼ терсавэйˮ товыць. Ӈэʼ тансянда яӈгусь. Ныланаваʼ яляхана хадыʼ тодоˮ тэнзˮ лампˮ лэё табцдэйдонзь. Хадыцямʼ ялэмдаˮмахадандоʼ салабахад сертавы хуркари ӈамгэриˮ, ӈацекыˮ сянакулваˮ, едэйкосяˮ ялэмаць. Тикыʼ хавна товыˮ мядонди маябтамба сёётанаˮ — сёётаць, таранаˮ — тараць, сянакубцˮ ӈадимдембиць. Ӈацекыˮ Ӈэрмʼ сей Иримдоʼ манэˮмандоʼ серʼ саць маймбиць, сянако нитоʼ пумна сюрберӈаць. Ханяӈыдоʼ едэйкурӈаць. Сэвниˮ пенё яднахани ненэй немʼ Татьяна Сэроймʼ ядабтадамзь. Пыда таремʼ мась:— Хусувэй поʼ тарця сава ялямʼ ниваˮ юрыбасетоʼ. Нумда тецябˮ ӈодˮ, нюˮниˮ няʼ товаць. Маняˮ ӈэрмʼ терӈэ сырэй тецьдахат теневаваˮ. Хуркариˮ ӈамгэхэˮ лавоˮлаӈганахани ӈацекыниˮ малʼ тодо яхана хаяˮ. Салаба едэйкулванʼ ӈулиˮ харваць. Тюку ялямʼ ӈатедонзь. Марˮнаˮ терˮ, ӈэрмʼ терӈэ едэй тованда поваˮ сававна ядабтахаваˮ. Янаˮ терˮ сенз ӈэяˮ.Лаханакурць няˮмы нями ненэциеˮ помна нюда пюванзь хаясь. Ненэсянда едэйкованзь товыˮ ситна мерцяхад ехэранаˮ тоˮолхаць. Маниебˮ, ӈацекэкоˮ ханакоӈэ мэтитоʼ вырнариˮ, тёрридоʼ соць. Ӈобˮ хасава ӈацекы тарця вади хэтась:— Мань Димадмʼ, еркарами Салиндер. Нябимдей классахана тохолкудмʼ. Небяниʼ няʼ тюконʼ тонинзь. Хадымʼ табцдадонзь. Тюкохона тэри савов, ялёв, ӈока ӈамгэмʼ манэˮӈадамзь. Небоʼ салабахад мивыдоʼ яӈгаркаць. Тедахав ехэранаˮ скульптура манэˮсарӈадамзь. Теневанаˮ, тохолко ниниˮ ходамзь. Сянакуваць. Ялэхэˮ тюконʼ туртадмʼ. Едэйковамʼ харвобтадмʼ. Нюрцямʼ ӈэсеты.Таремʼ округнаˮ терˮ Едэй помʼ ядабтаванзь саць маймбиˮ. Хусувэдоʼ тикыʼ няюʼ ӈамгэхэвмʼ сертаба варемда мэˮӈа. Руфина Окотэттоʼ падвы

Едэй понʼ саць маймбиˮ

<div class="content-lead">Ямал Ниԯи Пюԯ дян тайвай. Таньше каԯват таʼамна дятыԯмата, пыʼта пуˮ тахана мэтата шеԯта. Ямал Ӈиԯи чешча дяхана диԯина вӭйсыку. Ненэй матамэхэна пытыԯмы паныдюˮ мэшту, шича чуԯта, пеньшаԯта тадя.</div>Чейня ӈашкиˮ маймаӈ мэты, пон каԯват таʼамна дятэԯьшту. Таԯкан чеԯˮ нешаˮ Ямал Ниԯим «Северный характер» нимита мякна ӈэтаӈатоньш. Ӈука ӈашкиˮ вӭйсыкум манысодяш тоӈашˮ. Ямал Ниԯим няш шанаʼкушˮ, таԯаӈашˮ, хоровод мэӈашˮ. Таньше шанаʼкош ӈашкиудеˮ хомана майпишˮ.Ямал Ниԯи мыԯичуӈ ӈашкиˮ конкурсат «Елка Ямал Ири 2025» шеԯтаӈаш. Ӈука ӈашкиудиˮ поӈкнатуӈ мянаԯяшˮ. Мянаԯтаˮ каԯьтуӈ ӈутаханатуӈ Ямал Ниԯиӈ катукуӈ майшаԯт шеԯтапишˮ. Тайˮня чикитуӈ куше шеԯтапëмамтоӈ, видеон таттайтоньш. Ниԯинтуӈ манымаӈ мэты таньше ӈайтаптайтоньш. Ӈука ӈашкиˮ поӈкнатуӈ мянаԯяшˮ. Софья Уланова шеԯв пота, пыʼта чики конкурсхана мянаԯьш нэхэԯяш. Мячисэмта Ямал Ниԯиӈ ӈутахат няʼамӈаташ. Мянаԯмыˮ ӈашкӭхэт ӈопшеԯ ӈупдяӈкня ӈашкиˮ ӈайван каʼамдятˮ. Ӈыдитоӈ — няхаԯдяӈкнятоӈ ӈупчики деттуӈ ӈайтаˮ дипломуˮ, мячисыˮ няʼамӈашˮ. Ӈашкиудиˮ хомана майдяташˮ.Таԯкаӈ чеԯˮ нешайˮ поздравиймахатата Ямал Ниԯи ӈай мансхаԯяш. Каԯватˮ тахана шиʼта ӈэтанаˮ ӈашкиудеˮ ӈукаˮ. Ӈопшеԯ шитчетʼдяӈкня каԯватˮ конӈа. Шанат дюԯ ӈашкиˮ мячисэт миты.Автор: Андрей Пяк патмы

Ямал Ниԯин мячисыˮ

Татмаˮ: «Ямал-потомкам!» Молодёжный советʼ тамыˮ

<div class="content-lead">Пуровскийʼ районхана диԯинаˮ мэмятаˮ, нюӈк нешаˮ нэхэԯумпёш пытатуӈ конуԯпишˮ. Пюԯ дяхана ӈайта ассоциацин «Ямал-потомкам!» ӈаԯдяˮ ӈашкиˮ дет тонԯюта Молодёжныйʼ советхат мэнаˮ Новый Уренгойʼ няна дятыԯяшˮ. Таньняна мас-рестлингʼ дет ӈайта турнирхана нэхэԯумпёш мянаԯяшˮ. Мянаԯмантуӈ мэт Новый Уренгойдян шанат спортсменˮ тоӈашˮ.</div>Маняˮ Пуровскийʼ районхатна мэнаˮ ненаˮ дёԯьше хомана мянаԯяшˮ. Мас-рестлинг ненэй нэхэԯумпюмаԯа ниӈа — няӈта тасԯёта, правилаӈэ патаԯт патмы тапачаԯутаˮ тадяˮ. Куше шанаʼкумамтоӈ таньдет ӈайта судья маныдеӈатоньш. Маняˮ Пюԯдяхатана мэнаˮ спортсменˮ чупейˮ хомана нэхэԯумпишˮ.«Ямал-потомкам!» ӈаԯдяˮ ӈашкиˮ дет тонԯюта Молодёжныйʼ советхат мэнаˮ нэхэԯумпёш нюӈкмана мянаԯяшˮ. Шеттуӈ кашемʼдюԯˮ килограммʼ дёԯьшат ӈайта спортсменуˮ поӈкна Каԯясамэхэт мэна Дмитрий Айваседо ӈайвахай местам канаӈаташ. Дюԯкат ваʼта хампԯяӈк килограммуˮ шетта нешайˮ поӈкна Андрей Вэлло нимимты местан каʼамдяш. Руслан Казымкин шитчетʼдюˮ хампԯяӈк килограммуˮ шетта спортсменуˮ поӈкна нэхэԯумпёш няхамты местам каннаӈаш. Мянаԯтаˮ ӈашкиˮ поӈкна пиԯи нэхэтаӈӭ Богдан Пяк тонԯаӈаш, пыʼта ӈупчики ӈайвахай местам канаӈаш.Андрей Пяк патмыТатмаˮ: «Ямал-потомкам!» Молодёжный советʼ тамыˮ

Нэхэԯумпёш нэхэԯяшˮ

Сидяӈг: Хабэча Яунгадʼ тадтавы

<div class="content-lead">Невхы поˮ едэй илаӈгад яӈгавыˮ. Тедаʼ талраваʼ нямна вада ханда. Талрава — носи ӈобанзерˮ няˮамрава. Ненэцяˮ манзаяӈэ мэˮмэдоʼ. Тамальӈгана таремʼ нибˮ манзара еся яӈгуда. Едэй илʼ тоˮолха нивы ӈаˮ, хусувэй тоенана ӈамгэ ныхыхына нэкалпада ӈэвы.</div>Талраваʼ нямна «Няръяна Ӈэрм» газетанʼ тамальӈгы иламʼ манэˮмы не вадеˮӈадась. Пыда вэсаконда няʼ ӈацекытиˮ вадырˮ ямбанʼ, небяхаюта-нисяхаюта мякна таремриʼ илевэхэʼ. Тюку падвы вадахаˮна талраваʼ сермʼ тикы хадаʼ лахарёход тензебтеӈгуваˮ. Таремʼ ивхалпида:— Тикы серкана юˮ сидя хан тара. Таӈокӈэ хэбˮнандоʼ ӈодˮ, ханяӈэхэна ӈопойри нохокоцяри еремзеты. Юрмянваˮ ӈэсетываˮ. Пунда яӈгосеты. Нензелˮ манзая ни ӈаˮ, нохорˮ илена ӈамгэ нив ӈаˮ, тикар помнанаˮ ханда. Хане хэвандаˮ ненэй ненэцяˮ нюртеˮэʼ сиˮив тэмбоймʼ сиˮивӈэ ӈопой няхадандоʼ пенда мюд вэрдамбаӈгудоʼ, няби самляӈг нидоʼ тэри сыртаˮ. Тикы сиˮив тэмбойхана ӈопой нохоʼ тарˮ сяраӈгу. Хибя нохоʼ тармʼ нэкалмы ӈэӈгу, тикы неӈг пэртаӈэ толёда. Ябмʼ минреӈгу. Тикы няндоʼ еˮэмня хибяхарт ӈани ненэця яˮмаӈгуда, пыда сиципойˮ нохоˮ ниˮ еребертˮ.Неӈг пэртя — няби юˮ ӈэдалёда носи танаба талраваʼ ёльцяӈгана ваˮ еˮэйӈэ тараˮ. Таремʼ ӈоˮ сидда нядабада, са пэртярха ненэцяʼ таняӈгу. Неӈг пэртянда няʼ пыдридиʼ ханеӈгухуʼ, ваˮламаӈэ тараӈгухуʼ. Таремʼ толабˮ, носи танабада ӈэдалё ӈокхандоʼ ютёʼ ӈэӈгу. Неӈг тадтикахад самʼ пэртянʼ няби юˮ ӈэдалёдид носи вадˮ мюʼ пэртадревʼ тунихина едманзь танабидоʼ.Талраванзь хэвандоʼ нерня, ненэцяˮ ханзерˮ ханевамдоʼ тяхасовна помнандоʼ таслаӈгудоʼ. Тикандоʼ еˮэмня тоʼ сэрмʼ хоӈгуˮ — тикысипойˮ тарода яӈгода. Ханеваʼ ялядандоʼ сава ялямʼ таслаӈгуˮ. Наӈэдя ӈэсыӈэ ханевыˮ, хусувэй тарана ӈамгэрикудоʼ ӈулиˮ сававна тасламбавыдоʼ.Самляӈг юˮ нохомʼ хадавы ӈэбтоʼ, нохоˮ луцамʼ харадʼ няд ӈэдалё хосаяӈгудоʼ. Тамальӈгана еся буранˮ вуни таняˮ, тыˮ ӈэрихиˮна хубта янʼ хосаяӈгудоʼ. Луцамдоʼ няньмʼ хосаяваʼ мальӈгана хандоʼ пуняʼ пэндадоʼ.Талравари вуни ӈаˮ, тикыд халта, вэясялмда, пенахататоʼ хадидоʼ хаˮавра тараˮ. Ненэцяˮ носитоʼ хоб саляркасавэй, варавхана вэясялтемба халтаӈгудоʼ. Пуна яхана мэӈгудоʼ, пялаӈгудоʼ, тыраˮманда пуд мерцянʼ пинʼ сяраӈгудоʼ. Тикыдоʼ ӈаниʼ тырабта таравыˮ, пунариʼ вэясяламдаˮ. Ваˮлерта ӈока ӈэвы. Таремʼ ханзелиˮ пэрˮмахад хамбкархаˮ, лидряврахаˮ сэрˮ нохокоцидоʼ ӈысыʼ терӈэ нохоʼ луцанʼ мирдатыдоʼ. Сянбой падри нивы ӈаˮ, ӈарка хабтеʼ хоба тохоˮ падʼ терˮ ӈэвыˮ. Луца нохо тэмдаваʼ пуд есядоʼ ӈысыʼ терˮ помна тяртыдоʼ. Тикахавахад ӈаврандаванзь хандаˮ.<div class="content-new-image"><img alt="pic" src="https://storage.yandexcloud.net/ym-sites-static/27016f84-09e.webp" style="width:100%" height="1195" width="2124"/><div class="content-image_child">Сидяӈг: Хабэча Яунгадʼ тадтавы</div></div>Тикы есяханатоʼ хусувэй ӈамгэмʼ тэмдаӈгуˮ, ӈаврадоʼ няби пондʼ мадаба тэваӈгудˮ. Ненэйʼ ненэцяˮ хартоʼ помнандоʼ ӈобтаремʼ нохотоʼ хоба няхатоʼ ӈэмгэхэвˮ еˮэмня мирдапвыдоʼ. Ненэйхававна — тэвна. Самляӈг тыʼ мирта — юˮ нохо, солотоʼ пирувна миреˮмыˮ. Тедаʼ есяхана толабˮ, юˮ нохо — юрˮ сидя юˮ самляӈг ёнарˮ есяӈэ ханӈа. Ӈулиˮ тарана ӈавар тэмдабавыˮ: юрˮ, сакарˮ, няньˮ.Талрава ненэцие иле нядабавы. Тедаʼ есямʼ недвопа нензелˮ. Ӈопойриӈэ наӈэдя ӈысыʼ недбямʼ понхарт нида нэкалпаӈгуˮ. Тюку похона нохортмʼ хадаба ни тараˮ.Тюку невхы вадеˮмы иламʼ мале ӈарка не пуда лахарёмда малеˮванда серʼ маˮнисяв: «Хусувэй по харта нензелакуда таняˮ, таремʼ ӈоˮ тоенанида ӈобтаремʼ едтембиваˮ».Татьяна Сэройʼ падвы

Талрава

<div class="content-lead">Ӈарка пэвдей ирыʼ нюртей сиˮив яляхана Алушта хардахана «Кубок Содружества» ӈась. Таняна тодоˮ яʼ терˮ маˮлюрӈаць. Ӈокханда сиˮив яʼ лабакʼ едʼ сянакуць. Маняˮ Ямалхаднаˮ ӈаниʼ таняʼ ядэрӈаць.</div>Янаˮ терˮ Республика Крымʼ няна ӈока ныхымʼ, вырамʼ манэˮлабтавыць. Ӈаниˮ ялэтоʼ тотревʼ нерняʼ хаˮамвыдаць. Пыдоʼ сидя явна пирдырмыць. Сиддоʼ таремʼ тярмыць: ӈаркамбойˮ неˮ няби хасаваˮ, 16-17 похона мэнаˮ ӈацекыˮ. Белоруссия, Сербия, Индия, Камерун, Республика Конго яхат ӈэдахаˮна сянаковыць. Няхарˮ сянакубцри ӈэвы: ӈопой яхад няхарˮ мэва санарма, тубкамʼ моёпава, яркулава.Сямянхат тубкамʼ ӈахаˮ мовы Виктор Сегой, пыда Пякуˮ Яхад ӈа. Сергей няби Юрий Лаптандерхаʼ ӈобкана яркулавахана ваˮлёйхаʼ. Ӈопойюмʼ Яр-Саляʼ выӈгыʼ тер, нябиюмʼ Пэˮ хоюˮ няд ӈа. Тасуʼ яхад ӈэда Юлия Молодых тубкамда тидˮ мовысь, тикахад вадисей няби маханяӈы ӈудахана тубкамʼ моёпа пирˮмэда. Ӈадьбята сита нябимдей, няхаромдэй янʼ мэвыˮ. Вадим Худи тюрмʼ яркыбавахана няхаромдэй. 16-17 потаˮ поӈгана Александр Худи няби Иван Салиндер яркулавахана ваˮмэхэʼ. Александр — нябимдей, Иван — няхаромдэй.Юкад вата нюртей классахана мэнамʼ Вадим Худимʼ хонрамбидамзь. Пыда таремʼ лаханась:— Мань тарця пирдырманʼ сяхаӈгартʼ нидамзь ядэрˮ. Ӈока ехэрана ненэцямʼ торомдадмʼ. Ехэрана ямʼ манэˮмами ихинани ёльце сава. Таняӈы яхана тевʼ ёльцяӈгана иба. Явандоʼ иˮ ни ханиворˮ. Тэрихив таӈыʼ ёльцяндʼ тэвна тоˮолхынаць. Несэй сянакубц нянаˮ ӈадимдембиць. Тубкамʼ ӈулиˮ мерʼ моёпа тоходанаваць. Ядэръяваˮ сававна мэˮӈаваˮ!Яр-Саляхад нянанда ядэрмыˮ нида — Иван Салиндер, Александр Худи, Валентин Сэротэтто. Пыдоʼ малʼ юдимдей классахана тохолкуˮ. Сиддоʼ тидхалембадахаюдоʼ Пудако Сэротэтто няби Татьяна Барангулова.«Кубок содружества»мʼ нюбета пирдырма тодоˮ тэнз ненэцие маˮла. Ӈобтʼ тэвавыˮ ненэцяˮ нидоʼ торомдамбавыˮ. Няхатоʼ хартоʼ тэнзатоʼ сянакубц ӈадимдембавыˮ, вадеˮмыˮ. Маняˮ нинаˮ ӈэрмʼ терˮ сянакубцˮ нямна лаханавыˮ. Юнхавамдоʼ ёˮ ханяримна ӈэдаравыдоʼ. Тедаʼ хусувэй яʼ вакхана сёбарнаˮ теневэйдоʼ! Анна Яптикʼ падвы

Ӈобӈгэвʼ вырэйˮ

Сидяӈг: Марина Яр' тадтавы

<div class="content-lead">Ниниʼ мале ӈахакуй поход теневыниʼ, харта ӈодˮ ӈавнанда ӈопой яʼ терниʼ. Ӈулиˮ нямбара, сёётэй, лаханакула, мелʼ не — Нонна Салиндер хойхана тэхэната мюсерӈа. Сава юнмʼ намдˮмахадани нянда лаханадамзь.</div>Нями хой мякананда сэдоравысь. Маˮнисяв:— Соˮокмʼ сэдыбидмʼ. Харта ӈодˮ соˮок сямянхат тоенана ӈамгэ. Ненэй тыʼ хобахад сава ӈамгэ яӈгу. Овчинаˮя ӈаниʼ тэри хумбанзяда ӈэвысь. Небоʼ хасава нюни мальцяд тарцяхад сэдадамзь — волтадась. Маˮнисяв, тецьˮяӈа. Мядонаˮ Ямбургʼ няна ӈаˮ. Вэсакони няʼ тедариʼ сидямбойниʼ, нюниˮ школахана тохолкуˮ, ӈанидоʼ манзараˮ. Сиˮив нюми. Харˮнаˮ Паютеˮэʼ терӈэ толываˮ. Тарабата харданʼ есяʼ ханхана ӈэдалёрцетываˮ. Нуммаˮ яхананаˮ мерця, етриʼ хад, теци, небоʼ ибась. Тынаˮ мятоʼ хэвхана хадырӈаˮ. Вэвако нумгана мякˮ турта яӈгу. Тецьдахана ненэцяˮ мяканандоʼ мэˮ, тарабата тэридоʼ вэдеˮпиˮ. Тадриʼ ӈарка хасава нюми школахад папанада хосаяӈгу. Ӈахакуд паныдоʼ ӈанэдамбидмʼ. Буранахана 140 километрʼ пиркана Паютехэд тэвраӈгуда. Няднаˮ Ямбургтей хахаи. Нюниˮ Хальмерˮ Седеˮэнʼ тэвраванʼ харвэйнʼ, Паютеʼ няюʼ ӈэдалёрць пэдакабты.Мань харˮни еркарами — Яптой. Паютехэна Яптоӈэӈэ ӈавнанда Ӈэдяʼ терваˮ. Таремӈгав мюсе Ензяʼ няд товыˮ ӈэрхаˮ. Паютехэна Яптоӈэӈэ тянёваˮ, ӈопой мядʼ терваˮ. Ӈацекы ӈэдахани сё мэˮманʼ харвасетыдмʼ. Школахана хоранʼ ядэрцетыдмʼ, таняхавана луца сё мэцетываˮ. Тальцюна сини ӈарˮ ниниˮ малʼ ӈэбатоʼ тохолкованзь тюˮуʼ няӈы янʼ хаяць. Ӈулиˮ хамзасетын. Сё мэтаӈэ хэванʼ харвадамзь. Хойхана сиˮми ниниˮ хаець. Ӈобаӈгуна «Сыраʼ сэв» ансамбльʼ терˮ тараванзь турӈаць. Таʼ мальӈгана ини ӈыламна маˮнисядамʼ: «Сяхариʼ мань сидтоʼ тотревʼ ӈаниʼ сёмʼ мэтадмʼ. Таʼ мальӈгана тебкабцомʼ мэˮӈадамзь, ӈадьбятоʼ сиˮми хойхана хаець. Тикыʼ пуд тадебя сиˮми савумдась. Сиˮив поʼ ямбанʼ хаӈгурмадамзь. Тадебя маˮнисяв, ӈавнанда невхы иринанаˮ мэтормыˮ. Помнандоʼ тынзямʼ пидвыˮ, сидя Яптоӈэ вэсакохоʼ тынзямдиʼ матормэдиʼ. Тынзя сиˮми сохомдамбавы. Тадебя маˮнив, ёӈганда тяхана луца хэхэ ӈэбата тара. Таʼ ёльцяӈгана хэхэʼ лапка вуни таняˮ, ириеми хубт ложкахад крестмʼ сертась, тикакоцями капрон ниткахана минарӈавась. Пуна вадамбойʼ хаӈгурць ӈэвадэйваць. Пуна ириваˮ пензеретаванзь мяканаˮ ханзетываˮ.<div class="content-new-image"><img alt="pic" src="https://storage.yandexcloud.net/ym-sites-static/f060af38-c39.webp" style="width:100%" height="708" width="1260"/><div class="content-image_child">Сидяӈг: Нонна Салиндерʼ тавы. </div></div>Ӈани ӈобˮ илеˮмя сэвниˮ тяхад тарця ӈэвы. Нараʼ няна ӈэсыʼ терˮ хасаваˮ ниˮманда яхадей ханаванзь хэвыˮ. Мякана вэсакоˮ, пухуцяˮ, неˮ хаёвыˮ. Ӈобӈэ хаёˮмахадандоʼ яʼ мядота пявыда. Сянʼ яляʼ ямбанʼ таӈгмʼ юрвэдоʼ. Сеяндоʼ пина ханзосиˮ илевыˮ. Хадами яʼ мядотанʼ маˮмы: «Тадʼ нерня не ӈацекы сояˮбата нянд сяраӈгу». Тарця вади намда хакэця хэвы. Ти, пивня ядэртанʼ сиˮми сярвыˮ. Тикымʼ юдэрць манэˮсарцетыв. Хаюпа хэвани мальӈгана хадакоця хано няби няʼ ярэйдась. Еˮэйдани Яптойӈгад соявы не ӈацекымʼ сяраць. Тальняхавʼ ӈэвадэяць. Еˮэйдани ненэцьʼ сярбата таравакы.Тикавахад етʼ нюниˮ ӈадимяˮ, сэдоравани серʼ ини ӈыламна хыноцетыдмʼ. Мяни терˮ, небянаниˮ, нисянаниˮ, малʼ сё мэтаˮ ненэцянзь. Етриʼ хареˮ мэбˮни сёкоця мэцетыдмʼ. Сэдоранʼ, лаханаку мэтахаˮ инзеленʼ, вадидоʼ ӈэванд мюʼ хаˮморӈаˮ. Хусувэй вадакоцидоʼ ӈобтʼ маˮламбид. Таремʼ нюниˮ ӈармаʼ серʼ хуркариˮ конкурсхаˮна пыхыдами манэˮлабтамба пядмʼ. Надымхана, Хальмерˮ Седеˮэхэна, Паютехэна хыноцетыдмʼ. Москвахана «Сокровище Севера» ярмаркахана мэдамзь. Тедахавʼ мале нюмами таня. Нерцюбтʼ Тасуʼ явʼ терхат тарця нюбе няˮмарпавыˮ яӈгуˮ. Мань нерденадмʼ. Хойхана мэвами сиˮми нерняʼ нэкалˮмы ӈэӈгу. Невхы илми нёдадмʼ, ханяриʼ ӈэдалёрӈадмʼ. Салехардыхы «Душа тундры» нюбетанʼ хэванʼ харвадмʼ. Небоʼ сиˮми мале таняʼ хаӈаць. Таремʼ нись еревˮ. Неʼ манзаиниˮ вэӈгохона несэй сёдми маˮламба пяӈгудмʼ. Невхы сёˮ пелдоʼ харˮни тамнаʼ тяхаʼ тэврамбинʼ. Сёдоʼ тарцяˮ: ӈопой, сидя вада ӈэӈгу, тикыд вэрдамбинʼ. Таӈгавани серʼ мэцетынʼ. Вадамбойʼ падыбаӈгунʼ. Ибетахани падартʼ тэврамбаӈгунʼ, няби яӈорэйʼ толабани — ӈаниʼ едэй ӈамгэхэвмʼ мэӈгудмʼ. Ненэй ненэцяӈэ поӈгананаˮ хынотаваˮ тянё, масиˮ танянакыˮ, сядоларютанакыˮ, мюняндоʼ такалпидоʼ. Ябе сёхортар — сё ӈыˮ нивˮ. Невхы ненэцяˮ сёнзитоʼ мюня талёдидоʼ вадеˮмыˮ. Нерняӈыˮ ялэдоʼ вадетаˮ.Тарця сава не тюку поʼ ненэй ненэцяӈэ поӈгананаˮ лаханакулаӈэ таслаць. Нонна Салиндерʼ Яптойхат соявы ея мякананда ябти сёда тедалахана со.Марина Ярʼ падвы

Ваˮлёй не

<div class="content-lead">Едэй поʼ хэбидя ялэˮ товаʼ нерцюна Пэˮ хоюˮ няби Тасуʼ яʼ вымна мюсертаˮ нинаˮ мядʼ ӈамгэри няˮамвыць. Таремʼ «чумовой капитал» нюбетамʼ тюку поʼ няˮамвы ӈобтʼ толабˮ, ӈокханда сиˮив юˮ ӈэвы.</div>Нюртеюмʼ нядаӈгосэймʼ Приуральской районʼ ӈэвахана мэна ерв Марина Трескова мипвэдась. Алексей няби Наталья Лаптандерхаʼ няʼ миˮмыдась. Пэˮ терхаʼ няхарˮ хасава нюдиʼ. Нюдякодиʼ тюку поʼ неняӈгˮ ирыхына соявысь. Пыдиʼ ты пэртяхаʼ, похоˮ мюсерӈахаʼ. Тевʼ ёльцяӈгана Сиˮив Харвмʼ нюбета харадʼ хэвхана ӈэвадяромбихиʼ. Ӈаниˮ ты пэртяˮ тотревʼ сямян есямдиʼ тытиʼ ӈамзарихина хомбидиʼ. Ӈавнанда небяндиʼ мякана илевэхэʼ, тедаʼ хартиʼ мятиʼ ӈадимя. Нянандиʼ, ӈацекэхэютиʼ няна ханя сава, тарця нядˮманʼ малмбойʼ маймбиˮ. Таддикахад пыдоʼ едандоʼ ӈэда мятоʼ пеля сиˮив юдимдей.Нябиюмʼ мядʼ ӈамгэри Тасуʼ яʼ ӈэвахана мэна ерв Виктор Югайʼ ӈудахат, Алексей няби Светлана Салиндерхаʼ няˮамвэдиʼ. Пыдиʼ сидя хасава нюдиʼ, нюдяко не нюдиʼ таня. Алинакодиʼ тюку поʼ ты саполана ирыхына соявы. Нядаӈгосэйдоʼ нянандоʼ Едэй поʼ едʼ ӈэда мядонзэйраха. «Балок»андиʼ хавна ненэй мяцавэйхаʼ ӈэӈгухуʼ.Округхананаˮ «Чумовой капитал»мʼ 2021 поход мипидоʼ. Ямалнаˮ ӈуданданаʼ ватовна сертадонзь. Тедаʼ ӈэрмʼ терˮ ненадо нядаӈгосэйӈэ толы. Тандаяʼ мядʼ терӈэ хэвыˮ, сидя нюмʼ, тикэхэд ӈокарка ӈацекымʼ ховыˮ едʼ таславы. Няˮмарпадидоʼ малʼ мюсертаˮ ненэцяӈгаˮна тарана ӈамгэриˮ: хорˮ, ӈуˮ, еяˮ, ханˮ.Тарця нядˮмамʼ няˮмаваʼ еˮэмня падро маˮла тара. Тикахад районхана ӈэда серо пэлаваʼ мятʼ хэсь сероˮӈа. Хусувэй хардахана тарця серо минренидоʼ таняˮ.Анна Яптикʼ падвы

Сиˮив юдимдеймʼ миˮӈаˮ

<div class="content-lead">Тюку таʼ округнаˮ серо минренаˮ, ты пэртиˮ няби халямʼ хадабадиˮ серо тасламбадаˮ, ӈэрмʼ терˮ серо тидхалембада департаментʼ терˮ, малʼ ӈобанзерʼ ӈэдалёрӈаць. Пыдоʼ халямʼ пэртя ненэцие тидпойʼ лаханакурць няˮӈаць.</div>Янаˮ тиӈгывна ӈэда ёртиˮ хардахаˮ тэворӈаць. Ядэрмандоʼ мальӈгана ненадовна похоˮ иринатоʼ невхы иламʼ нёдана хонрамбиць. Няндоʼ тарця вадамʼ мэˮӈаць: «Ӈамгэʼ нямна иламдаˮ несэймдарка, савумдарка тара. Хурка нядаӈгосэй нянандаˮ тараваʼ серʼ ӈа?». Ёрвонаˮ ёртяхат мале ӈока сава иʼ ядэрабцомʼ намдавыць. Хартоʼ невхы иландоʼ саирмʼ нёданаˮ мини-электростанциямʼ тэмдабтоʼ, пуняʼ няˮмарпада есяндоʼ ӈокад 18 ёнаркад, 30 ёнарˮ ӈэсондʼ ӈокманзь мэ. Бензиндамдоʼ тэмдабтоʼ, пуняʼ няˮмарпада есямдоʼ 12 ёнарˮ ӈэсондʼ нядаӈгудоʼ. Ӈопой мядʼ терʼ еˮэмня сидя ладʼ панымʼ, спасательной жилетмʼ мипаӈгуˮ. Тедаʼ тикы манзаямдоʼ тамна нерняʼ минредоʼ. Ненэцяӈгат намдавыдоʼ саваркавна таслаˮмахадандоʼ, мэйраˮмахадандоʼ тад тованда похона ялянʼ ӈадимдемба пяӈгудоʼ.Тандаяʼ ӈаниʼ ӈопой сермʼ вадець пяць. Ӈани похона Ямалхана халямʼ хадабадиˮ нядˮма, «рыбацкий капитал» нюбета ӈадимзь пиртада. Ёртиˮ няˮмарпада нядˮмамʼ ӈокамдаваʼ нямна ӈэрмʼ терˮ серо тасламбада департамент лаханавысь. Маˮнимˮ, халямʼ хадабадиˮ нядˮмамʼ яˮмидхы илебцамдоʼ минренаˮ, халямʼ хадабадаӈэ таранаˮ няˮмарпа пиртадоʼ. Халямʼ хадабадиˮ едэй нядˮма ӈадимя тедариʼ тэри вада. Ханзерˮ таславадоʼ пунси. Ёртяхаˮна лаханакурмандоʼ пуд пуномда.Анна Яптикʼ падвыСидяӈгˮ: Марина Ярʼ тадтавыˮ

Едэй нядˮмадоʼ ӈадимда

Фото: Руфина Окотэтто/ "Няръяна Нгэрм"

<div class="content-lead">Тандаяʼ вадёданаʼʼ ӈацекыʼʼ поӈгана нерняʼ ӈэдидоʼ , тохолко ваʼʼ ёйдоʼ таняʼʼ. Ӈ ниʼʼ нидоʼ няндоʼ сыраць ӈ ниʼ варемдоʼ мэцетыʼʼ. Тарцяʼʼ няхатоʼ енасетыʼʼ.</div>Нямэхэна ӈ рмʼ терʼʼ тохолкодаʼʼ ӈ цекыʼʼ пирдырма ӈ сь. Ямалнаʼʼ тодоʼʼ хардахат маʼʼ лыць. Та мальӈгана Тасуʼ яхад товы не ӈацекымʼ торомдадамзь. Лахарёвнанда хамэдабʼʼ , ӈулиʼʼ харбё тоʼʼ олхась. Тохолковаʼ иланда, мята терʼʼ нямна лаханась:- Мань Ӈэдяӈгад тодамзь. Нисяхаюниʼ -небяхаюниʼ тыʼʼ мякана илеӈахаʼ. Нюдяко ӈэбниʼ сидя поʼ хадахаюниʼ няна иледамзь. Пуна нисями сиʼʼ ми хойʼ няʼ ханась. Ӈацекэӈэ мале сянваʼʼ : сидя ӈарка нями, нюдяко хасава нями, няхарʼʼ не нями. Хуна хынёсиʼʼ илеваʼʼ. Хойʼ няна малкосетыдмʼ. Мядʼ мюй манзаи пэрцедымʼ. Не няхаюниʼ , небями нядабасетыдмʼ. Нюдя ниниʼʼ сянакултамбасетыдмʼ. Пудана сидя поʼ Ензяʼ няӈы яхана илеваʼʼ. Небяхаюниʼ -нисяхаюниʼ пуняӈы яханаʼʼ хэванʼ харваӈахаʼ. Нюртеʼʼ эʼ Газ-Саляхана тохолкудамзь. Тедаʼ Ӈэдяӈгана интернатхана иледмʼ. Хасаваюдимдей классмʼ пэрӈадмʼ. Тэри нидмʼ мэсетуʼʼ. Ӈамгэхэв сертавандадми хосетыдмʼ. Ӈодякоход хуркариʼʼ паскойʼʼ ӈаво паӈгалпасетыдмʼ. Мадавы сэдыба теневадмʼ. Ханяӈэхэʼʼ на не ӈацекэӈэ харʼʼнаʼʼ помнанаʼʼ лаханакурцетываʼʼ. Выӈгана иленаʼʼ нинаʼʼ тензебтембасетываʼʼ.Хуркариʼʼ серкаʼʼ на ваʼʼ лёй ӈ эвы- Тохолковани ямбанʼ ваʼʼлёй ӈэвани еʼʼ эмня ненадумдаʼʼ ми недвоцетыдмʼ. Хуркариʼʼ олимпиадахаʼʼ на мэсетыдмʼ. Ӈудани терад няʼʼ амсетыдмʼ. Тарцяʼʼ пирдырмахаʼʼ на ӈопойри предметмʼ ниваʼʼ пэрцетуʼʼ. Школьной Советхана тарасетыдмʼ. Ӈэрёʼ школанаʼʼ президентад тэрабиць. Сиʼʼ ми тэравандиʼʼ пондʼ падвыць. Тохолковахана вареми мэцетыдмʼ. Харвобтанаʼʼ уроканиʼʼ : луца вада, математика, ненэциеʼʼ илʼ. Тохолковани хавна тараванзь ханцетыдмʼ. Мале сидндет поʼ таняна мэдмʼ. Хуркариʼʼ ненадоʼʼ , хэбидяʼʼ яляхаʼʼ на тарасетываʼʼ. 2024 похона Москванʼ ханʼʼ ӈаваць. Ӈарка маркана «Сокровища Севера» фестиваль ӈась. Тодоʼʼ яхат мядонда ӈокась. Сиднаʼʼ няхаромдэйӈэ тэраць. Тедахавʼ экзаменхаʼʼ хамекудмʼ. Малеʼʼ мяхадани ханяна тохолковани нямна ими ядэрӈа. Тедариʼ пунси.Анфиса Яройʼ манзаравамʼ ӈаниʼ теневада. Таʼ нёлёко ӈацекы тара тохоламбавысь. Тикымʼ ӈулиʼʼ тяхасовна вадеʼʼӈадась:- Хардахананаʼʼ «Авангард» нюбета мякана манзарадамзь. Ӈацекыниʼʼ мунʼ мянкоцяʼʼ ӈэсетыʼʼ. Хусувэй яляʼ ӈамгэм пэрманда ӈэвами хамедёсеты. Падартʼ падыбасетын. Сиʼʼ ми тидхалембадиниʼʼ таняць. Ирыʼ ямбанʼ пирдалевась. Пуна недбями няʼʼ мавась. Тарця теневабцомʼ тохалавами ихиняни саваʼ тоʼʼ олха. Вэбаʼ ирыʼ пудана сидя сиʼʼ ив яляхаʼʼ на Сочи мартʼ ханʼʼ ӈадамзь. Яхадани ӈэдалёртаʼʼ таняць. Таддикахад тодоʼʼ хардахат товыʼʼ ӈацекыʼʼ ӈаниʼ ӈокаць. Хорʼʼ ирыʼ ӈэсондʼ таняна мэваць. Ехэрана ядембада ямʼ манэʼʼ ӈадамзь.Ненэсянда ӈодʼʼ хусувэй тохолавы теневабцуда сяхариʼ нянанда тараӈгуʼʼ. Лаханако нями инда ядэробцо, сеянда ӈ амгэʼ нямна няркнавамʼ таремʼ хэтыдась:- Хойʼ илми, вадами ӈ улиʼʼ харвобтав. Нянани ёльце сава. Тедаʼ илебейʼʼ ненэцяʼʼ ӈокаюмʼ пелядоʼ манзаядамдоʼ тохолаванзь ханʼʼ ӈаʼʼ. Ты пэртяʼʼ тянюмданаʼʼ. Ӈаркаʼʼ ненэцяриʼʼ хаюрӈаʼʼ. Тыʼʼ мякнани мэванʼ харвадмʼ. Едэй яӈ амдана илаӈгана нензелʼʼ мана илеваʼ еʼʼ эмня тохолко ӈаниʼ тара.Руфина Окотэттоʼ падвы

Няръяна Нгэрм

Публикации автора