Няръяна Ӈэрм
Сяндаˮ хэбидяˮ яˮ
Мале танякуй похона ӈэрмʼ терˮ хэбидяˮ яˮ пидицяˮ нивандоʼ тэймандоʼ еˮэмня ӈопой падартʼ падыдонзь. Таняна ӈэдаˮ тэйпа нидоʼ ӈэдарамбюˮ. Сянда яӈэ толыˮ. Ненэй ненэцяˮ хэбидя ёдоʼ ӈаниʼ таняна падыˮ.
Таремʼ манзаранаˮ учёнойˮ сяӈок поˮ ненэцяˮ таняʼ ядэрмамʼ, хибя хэхэˮ яӈэ толёвамдоʼ тасламбиˮ. Хахаяда яляʼ Тасуʼ явʼ няд юнмʼ намдаваць. Таняна небоʼ учёнойˮ манзаравыˮ. Пыдоʼ тет хэбидя ямʼ («Сядэ хэхэʼ я», «Тадебя хэхэʼ я», «Тыʼ ӈэва седа», «Няхарˮ Ӈэвтеˮэ») сяндаӈэ нивыдоʼ таслаˮ. Маˮнимˮ, тарця серо ӈарка янаˮ законˮ саирмʼ нюракуць минрейдоʼ. Тедаʼ тикыˮ хэбидяˮ яˮ сяӈок пондоʼ ӈэвамʼ, хибяˮ мядʼ терˮ, еркарˮ ненадо яӈэ толёвамдоʼ тасла яˮамвыˮ. Ӈадьбята неры вадеˮмыˮ ёнаˮ сянда яӈэ нивыдоʼ падˮ.
Тарця ӈавэ тасла яˮамвандоʼ пуд тад нерняʼ ненадо яхатоʼ ненэцяˮ таремʼ ӈодˮ ядэрць пиртадоʼ. Яʼ тебтмʼ нэкадпадаˮ сехэрэнʼ нёховабтоʼ еревˮ, хэбидяˮ ёдоʼ тамна илева сенасиˮ яханатоʼ ӈэӈгуˮ. Ӈопой, тедаʼ ненэй ненэцяӈэ хэбидяˮ ёдоʼ хартоʼ лэтрамбабатоʼ тара.
Таремʼ мале танякуй похона Ямальской районхана ненэй ненэцяˮ хэбидя ямдоʼ хартоʼ мюмдедонзь. «Яʼ малʼ хэхэ» ненэй ненэциеˮ поӈгана сямянхат ӈарка хэбидя яӈэ таславы. Няданда ӈарка «Сэрˮ ӈо». «Яʼ малʼ хэхэ» ямʼ няюна ӈа. Таняна ты пэртяˮ хэбидя яндоʼ сиˮив мяˮ нямдо хартоʼ маˮлэйдонзь. Ханондаць. Тарабата сяхариʼ мюсертаˮ ненэцяˮ хэнумдорманзь тэворць пиртадоʼ.
Хэбидяˮ яˮ илеваʼ ямбанʼ ненэй ненэцяӈгана сяндаˮ ненадоˮ яӈэ толыˮ. Хэˮлиʼ таняʼ ниˮ ядэрˮ. Тарця сероˮ хара ӈаниʼ тенева тараˮ. Сянда падаркана ӈэбатоʼ, нибатоʼ ненэй ненэцяˮ тенхана ӈаˮ.
Марина Яройʼ падвы
Авторы
Няръяна Нгэрм
Темы