Лух Авт
Ханты уӆапса еӆащ тувман энмаӆӆаюв
Тата муң Порават нэ Елизавета хансапсы понӆув. Ӆув ай тэӆан аңкеӆа потрат туты нётаӆ. Аңкеӆ пиӆан ай куртат па вошат хуват яңхаӆ. Тухӆ ишан ащеӆан машинайн па ӆонщхопан тутӆыӆайңан. Хоты ханты мир уӆ, щит эӆты сэм пунсантмаӆ вуш эӆты уятаӆ. Нын ӆуңтаӆн, оша понаӆн, мосаң нын уӆапсайн эӆты моӆты ям верат нумаӆмиӆты.
Ханам ёх па ханам нэңат вуща уӆаты!
Там веӆащ мув еңитман шошийи уӆты рут мурат хатӆ постаса. Щи вер пеӆа номсэм тайӆэм.
Опем Порават нэ — Лилия па яйм Порават ху –Елисей.
Айи тэӆн ханты ясаңн, ханты сохн, ханты номасн, ханты рут юшӆув хуват яңхӆув. Хуӆ веӆман уӆты, каӆаңн яңхты рутӆув, ущты, ван таха хоятӆув пиӆн уйтантыӆув. Щутщаты порайн (отпускайн), еӆн уӆты ун вошата яңхтэвн, хунты мосӆ ханя, сай ясаң ястаты, муң кутӆувн рут ясңевн потарӆув. Потрэв ант ат моштаса.
Щиты унӆсам оӆаңан потарты. Ин ма хоӆна ашкуӆайн унӆтыӆам па ханты ясаңн радио хуват яйм па омем иты потарӆам. Вошн кепа уӆӆув, ханты ясңев ӆуттамев антам.
Вус хув порайи йис Пулңаватн хот ертэпев ӆыпийн урхот оматман тайӆув. Тови-ӆуң, ӆуң порайн — щит верантты лотэв. Опемн Поравт нэ Лилияйн этаӆтысаям, унӆтасаям нуй эӆты сорт пеңк эватты. Щи порайн ай, нияӆ-яртъяңкем таӆ усам. Юхат нуй ханшет ёшн ёнтсаман — нуйсах тэӆ. Муй верӆаман омем эӆты этаӆтыӆэман. Тухӆ порайн ёвра кепа тывӆ — яха туңматӆэв. Опем щи верат мостаӆ. Вуӆомем шуңатн ищи алиӆыса. Щишн ащем, яйм эӆты нуй кувщат ёнтылыяс. Вуӆомем шуңат эӆты нуй сах. Вуӆомем нуй сахӆ умщаӆаман тайсаӆы.
Порайн омем эӆты нуй сах ёнты номас вусман. Нуйт мосты щирн поныӆысӆы, минэман алиӆыман эватсаӆы. Ма туң яӆат оӆңа ёнтсам. Аяӆтайи нуй сахемн тывас. Хоӆна «Душа тундры» емаң хатӆ вантапса хоща этаӆтысэм. Юхат тови кепӆ эват ханшет ёнтсаман. Тови кепӆ ус пелкаӆн ханши хорас щуратӆаман. Ханши эватты кешийн опемн эвтамат эватсаят. Яха ӆуң сыс сах тэӆ ёнтсаман.
Там веӆащ Шошийи уӆты мур хатаӆ харн ишакты нэпекн «Ямал-Медиа» рупитты лот эваӆт мойӆаптасаям. Вет таӆ моӆтас ус, хоты ма яра радио хуват потарты питмемн. Аяӆтайи ханты ясңем уңӆэма, номсэма, питас.
Уятман тайӆэм Порават ху ащем ясаң! Емаң хатӆ харн, хунты ишакты нэпекем мойӆаса, еша еӆамсаям этты. Атяемн-омеман, рутӆамн нётсаям. Рутӆам емаң хатӆ харн ёхтыӆысат ма пеӆаем вантты. Амтатлиӆат ма урңемн.
Герман Наков ӆэщатсаӆӆы
Авторы
Лух Авт
Темы