Няръяна Ӈэрм
Сямянхат ӈарка ялядо’
Хусувэй по’ та’ ер’’ ялян’ тэвась, маня’’ яханана’’ хойхана мюсерта’’ , тэхэ’’ на мэна’’ нина’’ ӈарка ялямдо’ мэцеты’’. Та’ ямбан’ пэрта манзаядо’ тянё ни ӈа’’. Тарем’ ӈод’’ хой’ нина’’ хэбидя яляхандо’ нидо’ манэ’’ манзь’’ ёльцядамдо’ хосеты’’.
Ты пэрта’’ хэбидя ялядо’ выӈгана мэна’’ неняӈг’’ ирий’ пуданахад пилю’’ ирий’ тетимдей толыр’’ ӈэсонд’ яндаха’’ на ваераць. Маня’’ округханана’’ хаер’’ тарпорма’ няна мюсерта’’ ненэциена’’ таӈга иле’’ , мяд’ терсавэй’’ тыдо’ мание’’ , невхы’’ иринато’ неда нёда’’. Хибяхартахад нись пере’’ таняна серодо’ харто’ тасламбидо’.
Ваеравы юр’’ по’ хасуюдимдей похо’’ на илевы’’ нина’’ общинам’ сертаць, «Ямб то» — тарем’ нюмдедонзь, ӈарктадамдо’ тэраць. Няхатато’ нись пере’’ иламдо’ нерня’ минредо’ : тыдо’ мание’’ , хусувэй мяд’ тер’’ харто’ мято’ , мюсерць ядо’ таня.
Тарця ненэциена’’ мале ӈахакуд та’ ер’’ ялян’ тэвась таславы яханандо’ ӈобт’ ма’’ люрцеты’’. Тюку по’ ирий’ нюртейхана ты пэрти’’ ялям’ , сямян ивнандо’ ӈэда’’ «Ямб то» общинахана мэна’’ ненэця’’ мэ’’ ӈадонзь. Яля’ еркана Няръяна маркад таня’ мядонда’’ тэвыдаць. Хойхана иленаха’’ ихид минда вадидо’ хэтуванзь ты пэрти’’ серо тасламбада департамент’ , МФЦ’ манзарана’’ ненэцяӈга’’ на тарана падродо’ таслава’ е’’ эмня тоць. Тикы’ хавна тарана’’ ӈавори’’ — сян’ тэнз’’ ӈавар’’ , тандая’ ябцавы нянё, мядонзэй тэвравыць.
Ӈахат товы ням’ манэ’’ ма — маймбабцо
Ӈарка ялядо’ Павел Митрофанович, Татьяна Григорьевна Вылка, няби Варвара, Илья Нокретта мядырмахана ваерась. Пыдо’ товы’’ нидо’ сидя мякана ядабтамбидонзь. Маня’’ сидна’’ тандая’ пиревы ӈамза’ евэйхана ӈавламбиць, мякнандо’ сяйӈаваць. Хой’ ненэця’’ нямбара’’ , илм’ теневана’’ хибяри’’. Хэвханандо’ лаханавари сеян’ мэёвна ха’’ морӈа. Няндо’ сямян сава вада’’ !
Тикы’ поӈгана хэбидя ялям’ минрена’’ манзаидо’ пяць. Хоян’ Ты пэрти’’ яля то! Харто’ иламдо’ мэта’’ , тыдо’ пэртя’’ ненэця’’ ихид минда вади намдаць, мядонзэй ня’’ маць. Тикахад сянаковидо’ пяць. Илебей’’ ненэця’’ ӈули’’ я’’ авлыць, ныхыдо’ хуркари’’ пирдырмаха’’ на хорпидонзь. Хан’ тяха’ санарӈаць, сюрберӈаць, тюр’ ни’ тынзям’ моёпиць! Яля’ пуданахана тэхэ’’ на ӈэдалёрӈаць. Тикым’ маня’’ ниваць мание’’ , тиртя ӈанохона мале мякана’’ хаяваць.
Ненадо яляхана хой’ тер’’ нина’’ сававна нылэйдаць, поӈганандо’ пирдырӈаць, сянакуць, нидо’ манэць маймбиць, ӈани’’ мякат товы’’ нидо’ ядабтамбиць.
По’’ хэ’’ мяхад небянда мят’ тэвавы’’
Мария Семеновна Худя хойхана соявы некоця, хаюпа хэ’’ мяхаданда Усть Карахана иле. Ты пэрти’’ яляхана мядоманзь небяханда товысь, сидя нюмда хадаханда тэвравысь.
— Небями Александра Семеновна Тайбарей, тюку яхана нини’’ ня’’ мюсерӈа’’. Хаюпа хэ’’ мяхадани мякани тур’’ мами яӈгусь. Пон’ ӈэдалываць, Амдермахад хасава нями тэхэ’’ на сидна’’ тэврась. Ӈарка сехэрым’ мадава’’ , тэвына’’. Теневана’’ нини’’ хэвхана вареми мэ’’ ӈадамзь, ёльце сава! Сейми маймби, небякони ихина сава!
— Тюку иланд’ тасла «Ямб то» общинахана 22 мяд’ тер’’ , мал’ паӈгудо’ ты пэртяхат пере’’ , серм’ теневана’’ , тыдо’ сянда’’ , ямдо’ мэнена’’. Илан’ мэёвна сырта’’ , — тарця вади ненэциета нямна ервотадо’ Фёдор Нокретто мэ’’ ӈа. Пыда мэёвна манзарана хасава, серм’ хамадамбада, хусувэй таранахана нида нядабада. Тюку ялян’ харта мята мат’’ ӈэдалава, хэбидя ялян’ пухуцяда нюдяко не нюнда ня’ товэхэнзь.
Ты пэртина’’ тарем’ иле’’. Пыдо’ манзара’’ теневана’’. Похона ӈопой ныланасеты’’ — Ты пэрти’’ яляхана! Иландо’ хари’’ нядандо’ пере, мэёвна илена’’ хибяри’’ ! Пили’’ тарем’ ӈэя!
Автор: Юлия Талеева’ падвы
Авторы
Няръяна Нгэрм
Темы